А калі YouTube заблакуюць? Як беларусу выбраць разумны тэлевізар і не аблажацца

Прыстаўкі на Google TV прапануе кампанія Xiaomi, цэны на іх стартуюць ад 269 рублёў. З Android TV можна купіць бюджэтныя прыстаўкі фірмы Miru — ад 179 да 259 рублёў.

Кансультант крамы бытавой тэхнікі расказаў журналісту Еўрарадыё, які звярнуўся пад выглядам пакупніка, што смарт-прыстаўкі ўжо не такія папулярныя.

— Яны мала прадаюцца, многія тэлевізары і так ідуць з убудаваным Smart TV. Канкрэтна ў нас у краме, будзе добра, калі адну прыстаўку купяць раз на два месяцы.

Калі тэлевізару больш за 10 гадоў, спецыялісты раяць не купляць прыстаўку, а ўзяць новы тэлевізар з убудаванай Smart-сістэмай:

— Па якасці тэлевізары сталі нашмат лепшыя, гэта тычыцца і падсветкі, і распазнавання, і гуку. Але калі чалавека задавальняе яго тэлевізар, то можна спакойна купляць прыстаўку і карыстацца ёй, гады тры яна дакладна папрацуе.

Папулярныя сістэмы: Android TV і Google TV

Што тычыцца адрозненняў у асноўных сістэмах разумных тэлевізараў, розніцы паміж Android TV і Google TV практычна няма.

— Абедзве аперацыйныя сістэмы па-свойму добрыя. Яны адрозніваюцца толькі візуальна. Магчыма, Android-сістэма будзе крыху прасцейшай для ўспрыняцця. Яшчэ прыстаўкі на Google TV з'ядаюць больш аператыўнай памяці. А так, функцыянал і праграмы адныя і тыя ж. Шараговы карыстальнік наўрад ці адчуе розніцу, — запэўніў супрацоўнік крамы.

Android TV і Google TV могуць быць прадстаўленыя тэлевізарамі розных вытворцаў. Супрацоўнік крамы параіў звярнуць увагу на фірму Philips або Sony, але апошняй няма ў продажы праз санкцыі.

Яшчэ адна сістэма: Tizen

Гэтая аперацыйная сістэма ад Samsung на базе Linux разлічаная на тых, хто любіць гульні. У ёй ёсць свой браўзер і крама дадаткаў.

Кансультант звярнуў увагу, што тэлевізары гэтай аперацыйнай сістэмы ў Беларусі лепш купляць не старэйшыя за 2023 год, таму што большасць праграм у больш ранніх мадэлях будуць недаступныя.

— Тэлевізары 2021 і 2022 года знаходзяцца пад санкцыямі, плюс галасавы памочнік прадстаўлены толькі на англійскай мове, а многія праграмы будуць заблакаваныя.

Гэта значыць, старыя тэлевізары знаходзяцца пад санкцыямі, а новыя не?

— Афіцыйна тэлевізары 2023 года таксама знаходзяцца пад санкцыямі, але там усё працуе. І дадаткі, і гульні.

Адкуль у краме з'явіліся новыя падсанкцыйныя тэлевізары, ды яшчэ і з праграмамі, якія працуюць, супрацоўнік не ўдакладніў.

WebOS

WebOS — яшчэ адна папулярная аперацыйная сістэма на падставе Linux, прызначаная для тэлевізараў LG.

Работнік крамы лічыць, што гэта адна з найлепшых смарт-сістэм, якая зараз ёсць на рынку.

— Тут вельмі добрая аптымізацыя, сістэма лепш выбудаваная і нашмат менш марудзіць у параўнанні з канкурэнтамі. Плюс яна вельмі зручная ў плане візуалу.

Адзін з кансультантаў крамы расказаў, што галоўная фішка гэтых тэлевізараў — пульт з указкай LG Magic, з дапамогай якога можна вадзіць курсорам па экране. Таксама ў іх убудаваны галасавы памочнік "Аліса" ад "Яндэкса". Паводле яго слоў, WebOS — самая прадаваная сістэма ў іх краме.

"Яндэкс"

Аперацыйная сістэма ад расійскага вытворцы працуе на сістэме Android. Часцей за ўсё мадэлі з гэтай АС уваходзяць у катэгорыі бюджэтных тэлевізараў.