Каментатараў у Беларусі будуць ідэнтыфікаваць і праз акаўнты ў сацсетках

Каментатараў на сайтах у Беларусі будуць ідэнтыфікаваць і праз акаўнты ў сацсетках. Дагэтуль называўся варыянт актывацыі ўліковага запісу на сайце праз СМС, атрыманы на нумар мабільнага тэлефона, пазначанага ў карыстальніцкім пагадненні.

Як паведамляла Еўрарадыё, нядаўна Саўмін зацвердзіў парадак папярэдняй ідэнтыфікацыі карыстальніка інтэрнэт-рэсурса. Яму давядзецца заключаць дамову з уладальнікам сайта. Для гэтага трэба "засвяціць" свой нумар мабільнага тэлефона. У інтэрв'ю газеце "Беларусь сегодня" супрацоўніца Міністэрства інфармацыі Вікторыя Мялешка паведаміла, што азначае ў дакуменце "іншых ідэнтыфікацыйных дадзеных і тэхнічных сродкаў, якія дазваляюць ідэнтыфікаваць асобу карыстальніка". Паводле яе слоў, карыстальнік можа выкарыстаць для ідэнтыфікацыі свой акаўнт у сацыяльнай сетцы.

У Беларусі абавязковая ідэнтыфікацыя карыстальнікаў на сайтах уводзіцца з 1 снежня. Гэтага патрабуе абноўлены закон "Аб СМІ".