"Каб зразумець усю абсурднасць прапановы, варта згадаць, што УНС — не выбарны, а цалкам прызначаны орган, — піша Валерый Карбалевіч у Telegram. — Ягоная дзейнасць, як і спосаб абрання, не рэгулююцца ніякімі законамі... Удзельнікаў сходу фактычна прызначае мясцовая выканаўчая вертыкаль. На УНС прысутнічаюць не прадстаўнікі народу, а выключна прыхільнікі Лукашэнкі".
І атрымліваецца, што Усебеларускі народны сход — гэта "імітацыя народнага прадстаўніцтва". "Увогуле, як можа орган, які складаецца з 2,5 тысячы чалавек і збіраецца раз на пяць гадоў на 1-2 дні, выконваць функцыі прэзідэнта? — працягвае Карбалевіч. — Гэта нейкі абсурд у квадраце".
Палітычны аналітык мяркуе, што ініцыятыва Аляксандра Лукашэнкі — "гэта мадэль Назарбаева ў мадэрнізаваным выглядзе" [Назарбаеў пасля 29 гадоў прэзідэнцтва стаў "Лідарам нацыі" і захаваў за сабой пасаду кіраўніка Саўбеза, старшыні партыі]. "Калі так, то ўсё стае на свае месцы, — працягвае Валерый Карбалевіч. — І, на першы погляд, абсурдная схема выяўляецца вельмі лагічнай".
Палітычны аналітык адзначае, што кіраўніку прэзідыуму сходу, у адрозненне ад прэзідэнта, "не трэба выбірацца... бо сам УНС не выбіраецца". "Можна ад імя народу кіраваць да канца жыцця, — піша Карбалевіч. — Пасля гэтага можна смела і лёгка выконваць сваё абяцанне правесці датэрміновыя прэзідэнцкія выбары. І сапраўды: не падмануў жа, сышоў з пасады прэзідэнта".
