КДБ раскрыў падрабязнасці "справы дактароў"
КДБ Беларусі пацвердзіў затрыманне за хабар дырэктара РНПЦ траўматалогіі і артапедыі Аляксандра Бялецкага, пра якога раней пісала Еўрарадыё. У гаражы і ў схованках кіраўніка навукова-практычнага цэнтра выяўлена каля 500 тысяч долараў у эквіваленце. Пра гэта паведамляе старшыня КДБ Валерый Вакульчык.
Ён адзначыў, што, нягледзячы на прафілактыку, у сферы аховы здароўя выяўляюцца новыя факты карупцыі. Так, па словах Вакульчыка, Аляксандра Бялецкага затрымалі і ўзялі пад варту "за арганізацыю правядзення тэхнічнага абслугоўвання і рамонту медыцынскага абсталявання з боку камерцыйных структур і своечасовую аплату за аказаныя паслугі".
Па падазрэнні ў здзяйсненні злачынстваў, прадугледжаных арт. 430 ("атрыманне хабару"), арт.431 ("дача хабару") і арт.243 ("ухіленне ад выплаты сум падаткаў, збораў") Крымінальнага кодэкса Камітэт дзяржбяспекі затрымаў, заключыў пад варту , а таксама прымяніў іншыя меры стрымання ў дачыненні да 37 службовых асоб. А ўсяго па карупцыйных справах праходзіць больш за 60 фігурантаў. Як піша БЕЛТА, усе яны неаднаразова атрымлівалі незаконныя ўзнагароджанні за садзейнічанне ў пастаўцы медабсталявання і медыцынскіх прэпаратаў па завышаных коштах.
Гэта пацвердзілі аператыўна-вышуковыя мерапрыемствы, паказанні сведак і словы саміх абвінавачаных, а таксама вынікі ператрусаў і выманняў. Усім прыцягнутым да крымінальнай адказнасці, акрамя затрыманых 10 ліпеня, выстаўлены абвінавачанні.
