Легалізацыя аднаполых шлюбаў у Грэцыі і паўгода турмы Сарказі — #ІхНоравы

16/02/2024 - 15:34

Агляд міжнародных навін / @rubanau_collage

На што скардзіцца ў турме Андэрс Брэйвік і хто супраць аднаполых шлюбаў у Грэцыі. Пра гэта і не толькі расказваем у нашым штодзённым аглядзе міжнародных навін.

"Гістарычная вяха". Грэцыя легалізавала аднаполыя шлюбы

Парламент Грэцыі ў чацвер прагаласаваў за легалізацыю аднаполых шлюбаў і ўсынаўленне дзяцей аднаполымі сем'ямі. Грэцыя стала 37-й краінай у свеце і першай праваслаўнай краінай, якая ўзаконіла такія шлюбы.

Закон лабіраваў асабіста прэм'ер-міністр Кірыякас Міцатакіс, лідар кансерватыўнай партыі "Новая дэмакратыя".

"Гэта гістарычная вяха ў справе забеспячэння правоў чалавека, якая адлюстроўвае сённяшнюю Грэцыю — прагрэсіўную, дэмакратычную краіну, якая горача верыць у еўрапейскія каштоўнасці" — напісаў прэм'ер-міністр Міцатакіс у Х.

У самой Грэцыі не ўсе паставіліся да закона станоўча.

Напрыклад, Грэцкая (Эладская) праваслаўная царква, якая мае ў краіне статус "пераважнай рэлігіі" выступіла супраць легалізацыі.

Архіепіскап Афінскі і ўсёй Элады Еранім II заявіў, што гэта — спроба навязаць краіне новыя рэаліі, якія разбураюць тканку грамадства.

А ў нядзелю ў Афінах прайшла дэманстрацыя супраць новага закона. На яе з абразамі і распяццямі ў руках выйшлі каля чатырох тысяч чалавек.

Экс-прэзідэнт Францыі правядзе паўгода ў турме

Былога прэзідэнта Францыі Нікаля Сарказі прызналі вінаватым у незаконным фінансаванні перадвыбарнай кампаніі ў 2012 годзе.

Сарказі прысудзілі да аднаго года турмы яшчэ ў 2021 годзе — тады яго ўпершыню прызналі вінаватым, аднак пакаранне прыпынілі праз апеляцыю палітыка.

Апеляцыйны суд пацвердзіў прысуд і прызначыў яму паўгода турэмнага зняволення — другую палову тэрміну ён зможа адбыць дома, з электронным бранзалетам.

Пасля свайго прэзідэнцкага тэрміну ва ўладзе ў перыяд з 2007 па 2012 год Сарказі сутыкнуўся з шэрагам юрыдычных праблем: яму прад'явілі абвінавачанні ў карупцыі, хабарніцтве, умяшанні ў справы і парушэнні правілаў фінансавання выбарчай кампаніі.

Ён стаў першым прэзідэнтам Францыі пасля Другой сусветнай вайны, якому прысудзілі рэальны, а не ўмоўны турэмны тэрмін. Сам Сарказі адпрэчвае ўсе абвінавачанні.

Нарвежскаму тэрарысту Брэйвіку адмовілі ў змякчэнні ўмоў утрымання

Суд у Нарвэгіі адмовіў Андэрсу Брэйвіку, які адбывае 21-гадовы тэрмін за забойства 77 чалавек у 2011 годзе.

У сваіх ісках ён скардзіўся, што ўмовы ўтрымання ў нарвежскай турме парушаюць яго правы.

Брэйвік падаў на дзяржаву ў суд і заявіў, што працяглая ізаляцыя была парушэннем Еўрапейскай канвенцыі па правах чалавека.

Падчас слуханняў забойца казаў, што пакутуе на дэпрэсію і залежыць ад антыдэпрэсантаў, а таксама расказаў, што яго "падштурхоўваюць да суіцыду".

Нарвежскія ўлады адмаўляюць абвінавачанні Брэйвіка і заяўляюць, што строгія, але камфортныя ўмовы ўтрымання Брэйвіка, апраўданыя, улічваючы рызыку, якую ён прадстаўляе для навакольных.

Нагадаем, 22 ліпеня 2011 года Брэйвік падарваў бомбу каля ўрадавых устаноў у Осла, забіўшы восем чалавек, а затым застрэліў яшчэ 69.

У 2012 годзе яго прыгаварылі да 21 года турмы. У няволі ў Брэйвіка ёсць тры асобныя пакоі: спальня, кабінет і трэнажорная зала. Ён таксама можа карыстацца агульнымі зонамі — кухняй, гасцінай і пакоем для спатканняў. У камеры ў яго ёсць тэлевізар, гульнявая прыстаўка Xbox і тры папугаі.

Мадрыд плануе велізарны феерверк у запаведніку. Эколагі абураюцца

Арганізацыі абароны жывёл у Іспаніі пратэстуюць супраць планаў гарадскога савета Мадрыда зладзіць шумны феерверк у рамках фестывалю "Масклета", які хочуць правесці ў нядаўна створаным запаведніку на рацэ Мансанарэс.

Абаронцы жывёл кажуць, што выбух трохсот кілаграм феерверка можа прывесці да вымірання дзікай прыроды запаведніка.

У 2016 годзе пачалася праграма ачысткі ракі Мансанарэс, якая працякае праз увесь Мадрыд. Тут жыве мноства рыб, земнаводных і дробных сысуноў, напрыклад, выдры.

Па словах эколагаў, з усіх мерапрыемстваў, якія савет мог бы выбраць, "Масклета" — найбольш небяспечная для дзікіх жывёл. Даследаванне, праведзенае летась, паказала, што феерверкі аказваюць негатыўнае ўздзеянне на папуляцыі дзікіх птушак.

"Масклета" — валенсійская традыцыя феерверкаў і частка фестывалю, які штогод праводзіцца ў Валенсіі ў сакавіку. Яго сутнасць у спаборніцтве паміж жыхарамі раёнаў за стварэнне самых відовішчных феерверкаў.
Цяперашняя "Масклета" з'яўляецца часткай сумеснай праграмы Мадрыда і Валенсіі па прывабліванні турыстаў.