Літва не плануе закрываць пункты пропуску на мяжы з Беларуссю
Беларуска-літоўская мяжа / jp.lt
Урад Літвы пакуль не разглядае магчымасць закрыцця новых памежных пунктаў з Беларуссю, цытуе літоўскую прэм'ер-міністарку Інгрыду Шыманітэ мясцовае выданне JP.lt.
Ініцыятыва разгледзець магчымасць закрыцця яшчэ двух памежных пунктаў на мяжы з Беларуссю (і Расіяй) належыць Камітэту па бюджэце і фінансах Сейма. Мэта такой ініцыятывы — барацьба з кантрабандай, якая нярэдка трапляе ў Літву ў тым ліку з Беларусі. Закрыццё пунктаў пропуску лічаць эфектыўнай мерай у барацьбе з кантрабандай і ў Міністэрстве ўнутраных спраў.
Прэм'ер-міністарка не адмаўляе, што ў далейшым урад можа разгледзець і новыя абмежаванні, але пакуль гэтага пытання на парадку дня няма.
На гэты момант застаюцца адкрытымі чатыры з шасці пунктаў пропуску, праз якія ажыццяўляецца рух пасажыраў і грузаў паміж Беларуссю і Літвой. Два пункты Літва закрыла ў жніўні гэтага года.
