Лукашэнка адправіў Зайца і Русага ў Магілёў і паабяцаў прыязджаць штомесяц

Былы міністр сельскай гаспадаркі стане старшынём Магілёўскага аблвыканкама (Уладзімір Даманеўскі быў адпраўлены ў адстаўку пасля "шклоўскага скандалу"), былы віцэ-прэм'ер — памочнікам прэзідэнта, інспектарам па гэтай вобласці (Генадзь Лаўрэнкоў выконвае абавязкі старшыні Шклоўскага райвыканкама). Адзначаецца, што рашэнні будуць аформлены ў бліжэйшы час.

"Гэта загад: вы ўдваіх едзеце ў Магілёўскую вобласць, навядзеце там жалезны парадак і дакладзіце мне, — гаварыў Аляксандр Лукашэнка. — ...Але перш за ўсё вы там пасееце як трэба, па тэхналогіі. І на працягу месяца, калі вам трэба перавесці Магілёўшчыну на ваеннае становішча, як цяпер у "Купалаўскім", пераводзьце".

Лукашэнка паабяцаў, што штомесяц будзе ездзіць да Зайца і Русага ў Магілёўскую вобласць. "Чым змагу, тым дапамагу", — сказаў ён. Але падкрэсліў, што на новым месцы працы яны павінны даказаць, што з'яўляюцца "сапраўднымі мужыкамі".