Лукашэнка анансаваў авіярэйсы з Беларусі ў Крым

У адказ на закрыццё неба над Украінай для беларускіх авіякампаній Аляксандр Лукашэнка анансаваў рэйс з Беларусі ў Крым. 

"Украіна закрыла для нас неба. У нас ёсць свой санаторый у Крыме, у Місхоры, куды людзі заўсёды ездзілі, ляталі. Каб не абвастраць адносіны, мы праз Украіну — хто на цягніку, хто на аўтамабілі, хто на самалёце. Цяпер закрылі неба. Я сказаў Пуціну: "Ты падумай, як нам трапіць у Крым. Не праз Польшчу ж мы паляцім: туды таксама не пускаюць", — перадае БЕЛТА словы Лукашэнкі.

Ён заявіў, што адпаведным ведамствам далі заданне, каб яны прапрацавалі пытанне.

Верагодна, рэйсы з Беларусі ў Крым будуць адбывацца праз Расію. Між тым, Украіна ўспрымае ўсіх, хто трапляе ў Крым з тэрыторыі Расіі, як парушальнікаў украінскай мяжы. Гэта пагражае ім забаронай на ўезд ва Украіну. 

Дарэчы, Беларусь дагэтуль афіцыйна не прызнала Крым часткай Расіі.