Лукашэнка патэлефанаваў у Казахстан і перадаў Такаеву словы Пуціна
5 студзеня Аляксандр Лукашэнка патэлефанаваў у Казахстан і перадаў прэзідэнту Касыму-Жомарту Такаеву словы Уладзіміра Пуціна. Гэта вынікае з кароткага паведамлення пра тэлефонныя размовы. Спачатку Лукашэнка патэлефанаваў у Маскву і пагаварыў з расійскім прэзідэнтам, і толькі пасля адбылася яго тэлефонная гутарка з прэзідэнтам Казахстана. Іх назвалі "кансультацыямі" па сітуацыі ў гэтай краіне. А яна ўжо некалькі дзён ахоплена пратэстамі і на першае месца выйшлі палітычныя патрабаванні, а сярод іх і сыход з палітыкі экс-прэзідэнта Нурсултана Назарбаева. Яго Лукашэнка лічыць сябрам.
Што могуць прапанаваць Такаеву Пуцін і Лукашэнка? Вайсковую дапамогу? Як піша БЕЛТА, "у пастаянным кантакце знаходзяцца лідэры ўсіх краін АДКБ". Шмат залежыць ад таго, наколькі радыкальнымі і маштабнымі будуць пратэсты ў Казахстане ў бліжэйшы час.
Тым часам ва ўсім Казахстане ўвялі надзвычайнае становішча.
