Лукашэнка выявіў у Беларусі харчовую дыверсію

Кіраўнікі шэрагу гаспадарак "завалілі" падрыхтоўку да ўборачнай кампаніі, у асобных арганізацыях нават не пачыналі рамантаваць тэхніку. І мясцовыя ўлады на гэта ніяк не адрэагавалі. Аляксандр Лукашэнка мяркуе, што ў гэтым выпадку гаворка ідзе пра "харчовую дыверсію".

"Фактычна кожны дзясяты камбайн не гатовы да працы. Няма механізатараў, кажуць. Як няма? Бо мы яшчэ летась восенню дамовіліся", — казаў Лукашэнка ў аўторак на нарадзе, прысвечанай ходу ўборачнай. Яго словы падае БЕЛТА.

Ён таксама расказаў, што "не ўсюды працуюць элеватары і склады для захоўвання збожжа" — у кожнай чацвёртай гаспадарцы, як высветлілася пры праверцы. Акрамя таго, практычна ў кожнай другой з правераных гаспадарак корм нарыхтоўваўся з парушэннямі рэгламенту. "Пра якую выканальніцкую дысцыпліну можа ісці гаворка, калі з года ў год міліцыя выяўляе п'яных на працоўным месцы? І іх нямала", — задаў рытарычнае пытанне Аляксандр Лукашэнка. Пры гэтым ён зноў казаў пра сусветны голад і шанцы для беларускай сельскай гаспадаркі.