Маці гомельскага палітвязня асудзілі за ўкраінскі сцяжок на акне
28 лютага ў Гомелі адбыўся суд над Валянцінай Міронавай — маці палітвязня Іллі Міронава, паведамляюць праваабаронцы.
На яе склалі пратакол паводле "народнага" артыкула 24.23 КаАП. Нагодай стаў украінскі блакітна-жоўты сцяжок, які стаяў на прываконні ў яе дома. Паводле пратакола, сцяжок быў бачны ў акне з вуліцы.
Валянціну Міронаву аштрафавалі на 160 рублёў (5 базавых велічыняў).
Вядома, што жанчыну затрымалі ўвечары 25 лютага, а потым пасадзілі ў ІЧУ. Узяць з дому неабходныя рэчы ёй не дазволілі.
