Масквіч ехаў праз беларускую мяжу з гашышам у пашпарце
Грамадзяніна Расіі асудзілі ў Брэсце за спробу перавезці гашыш праз мяжу. Падрабязнасці спарвы агенцтву БЕЛТА расказала памочнік Брэсцкага транспартнага пракурора Таццяна Савіч.
Інцыдэнт адбыўся 30 чэрвеня. Мужчына ехаў пасажырам у легкавым аўтамабілі праз міжнародны пункт пропуску "Брэст" у Польшчу. Падчас мытнага кантролю інспектары выявілі ў яго пашпарце палімерны пакецік з падазроным рэчывам. Экспертыза паказала, што ў пакеціку быў 1 грам гашышу. Масквіч патлумачыў, што набыў наркотык для сябе.
Суд Маскоўскага раёна Брэста прысудзіў расіяніна да трох гадоў калоніі ўзмоцненага рэжыму. Прысуд не набыў законную сілу, ён можа быць абскарджаны і апратэставаны.
