Мігранты актывізаваліся на беларуска-латвійскай мяжы
Мяжа Беларусі і Латвіі / Дзяржаўная памежная ахова Латвіі
Апошнія тры дні істотна павялічыўся паток незаконнай міграцыі на беларуска-латвійскай мяжы, паведамляе Дзяржаўная памежная ахова Латвіі.
За мінулыя суткі латвійскія памежнікі прадухілілі 62 незаконныя спробы перасячэння мяжы.
Каментуючы журналістам сітуацыю, начальнік Дзяржаўнай памежнай аховы Латвіі Гунтыс Пуятс падкрэсліў: "Апошнія тры дні мы сутыкаемся з досыць інтэнсіўным патокам асоб, якія жадаюць трапіць у Латвію нелегальна. Учора было прадухілена 65 такія спробы, заўчора — 51, а да гэтага — 47".
Паводле яго, нерэгулярныя мігранты актывізаваліся на латвійскім кірунку. Адпаведна іх колькасць зменшылася ў суседніх краінах — Літве і Польшчы.
Для параўнання: беларуска-польскую мяжу 3 ліпеня нелегальна спрабавалі перайсці больш за 30 чалавек, 2 ліпеня — амаль 50 чалавек, 1 ліпеня — толькі 20. У Літве спробаў нелегальнага перасячэння мяжы за апошнія тры дні не зафіксавалі.
