Раўкоў: Беларусь сама будзе вырашаць, ці неабходныя ёй расійскія вайсковыя базы
Партыя БНФ атрымала адказ з Міністэрства абароны і Савета бяспекі на свой зварот наконт расійскіх вайсковых аб'ектаў у Беларусі.
Зварот, прыняты 23 чэрвеня Соймам партыі БНФ, патрабаваў не падаўжаць тэрмін знаходжання расійскіх вайсковых базаў у Беларусі. ПБНФ спасылалася на тое, што пры вайсковым канфлікце трэцяга боку з Расіяй тэрыторыя нашай краіны становіцца першаснай мішэнню. Таксама ў якасць аргументу прыводзілася агрэсіўная знешняя палітыка, якую Расія праводзіць цягам апошніх пяці гадоў.
На тэрыторыі Беларусі цяпер ёсць два расійскія вайсковыя аб’екты. Гэта 43-і вузел сувязі ВМФ Расіі “Вілейка” (радыёстанцыя “Антэй”) і радыёлакацыйная станцыя “Волга” каля Ганцавічаў.
У сваім адказе міністр абароны генерал-лейтэнант Андрэй Раўкоў паведамляе, што пагадненні аб размяшчэнні гэтых аб’ектаў набылі моц 7 чэрвеня 1996 года. Яны працягнуць дзейнічаць да 7 чэрвеня 2021 года, а пра намер адмовіцца ад іх працягу Беларусь можа паведаміць расійскаму боку да 6 чэрвеня 2020-га.
Мінабароны адзначае, што ацэньваць мэтазгоднасць працягу ці спынення гэтых дамоваў будзе з улікам нацыянальных інтарэсаў Беларусі.
У адказе Савета бяспекі гаворыцца, што пытанне пра гэтыя дамовы будзе разглядацца з улікам абставінаў і прапановаў, выкладзеных у звароце ПБНФ.
