Міністэрства культуры Беларусі абвясціла конкурс памятнага знака “Курапаты”
Міністэрства культуры Беларусі абвясціла конкурс эскізаў памятнага знака “Курапаты”. Паводле палажэння конкурсу, яго мэтай з’яўляецца “пошук найбольш выразнага мастацкага адлюстравання вобраза ўрочышча “Курапаты”, як агульнанацыянальнага месца памяці і прымірэння”. Да ўдзелу запрашаюцца толькі скульптары і архітэктары, якія маюць адпаведную прафесійную адукацыю.
Арганізатары адзначаюць, што “кампазіцыйнае і пластычнае выкананне памятнага знака мемарыяла павінна быць вытрымана ў найлепшых традыцыях класічнага і нацыянальнага манументальнага мастацтва, лаканічна ўпісвацца ў ландшафт, быць прысвечаным трагічным падзеям, якія адбыліся ў дадзеным месцы, і адлюстроўваць ідэю увекавечання памяці ўсіх бязвінна загінулых ахвяр XX cтагоддзя ў гісторыі Беларусі”, — прапісана ў палажэнні конкурсу.
Пры гэтым днямі Аляксандр Лукашэнка заявіў, што ў "даручыў стварыць акуратны, не гіганцкі — не Брэсцскую крэпасць — мемарыял. Мы зробім гэты мемарыял, можа, нешта кшталту невялікай каплічкі".
Заяўкі прымаюцца да 26 красавіка 2017 года. Усе пададзеныя матэрыялы будуць разгледжаныя на закрытым пасяджэнні журы не пазней за 1 траўня мая 2017 года. Колькі будзе выдаткавана грошай на стварэнне памятнага знака, а таксама імёны ўдзельнікаў журы пакуль не паведамляюцца. Палажэнне конкурса і форму заяўкі можна паглядзець на афіцыйным сайце Міністэрства культуры Рэспублікі
Беларусь (у рубрыцы — "Конкурсы і мерапрыемствы")
