Міністр ЖКГ расказаў, калі беларусы будуць плаціць 100% "камуналкі"
Чыноўнікі хочуць заахвочваць беларусаў да ўстаноўкі лічыльнікаў цяпла. Пра гэта заявіў міністр жыллёва-камунальнай гаспадаркі Аляксандр Церахаў на пашыраным пасяджэнні Прэзідыума Савета Рэспублікі і Савета па ўзаемадзеянні органаў мясцовага самакіравання пры верхняй палаце парламента, перадае БЕЛТА.
"Зараз мы распрацоўваем праект нарматыўнага прававога акта, які накіраваны на стымуляванне грамадзян да эканомнага расходавання цеплавой энергіі", — заявіў Церахаў. Па яго словах, прадугледжваецца як дзяржаўная падтрымка, так і ўцягванне сродкаў грамадзян, бо 94% жыллёвага фонду знаходзіцца ў прыватнай уласнасці.
Церахаў нагадаў, што з 1 студзеня 2018 года жыхары Беларусі будуць аплочваць 100% усіх паслуг ЖКГ, за выключэннем цеплавой энергіі. Але аплата цяпла — самы вялікі артыкул выдаткаў пры аплаце жыллёва-камунальных паслуг.
На пасяджэнні старшыня Савета Рэспублікі Міхаіл Мясніковіч заявіў, што пытанні цеплазабеспячэння — гэта адна з прыярытэтных задач. Ён канстатаваў, што ёсць недахопы ў сістэме ўліку адпушчанай цеплавой энергіі.
