МУС падрыхтавала канцэпцыю законапраекта аб папярэджанні гвалту ў сям'і
Міністэрства ўнутраных спраў Беларусі падрыхтавала канцэпцыю законапраекта аб папярэджанні гвалту ў сям'і. Па словах намесніка начальніка галоўнага ўпраўлення аховы правапарадку і прафілактыкі МУС Алега Каразея, ужо прапрацавана яго прыкладная структура. Да ліпеня дакумент мусіць быць узгоднены з усімі зацікаўленымі ведамствамі. Пасля гэтага яго ўнясуць на разгляд у Савет міністраў. Калі да законапраекта не ўзнікне пытанняў, у кастрычніку яго атрымае Аляксандр Лукашэнка. Парламентары могуць прыняць закон у наступным годзе.
"Дакумент атрымаўся аб'ёмным, — цытуе словы Каразея прэс-служба МУС. — У ім прааналізаваныя існуючая нацыянальная заканадаўчая база, усе міжнародныя абавязацельствы рэспублікі і замежная практыка".
У лютым 2018-га на пасяджэнні Савета бяспекі пра праблему гвалту ў сям'і выказваўся Аляксандр Лукашэнка. Ён лічыць, што прымаюцца недастатковыя меры па яго папярэджанні (гл. відэа).
