“Мы бачылі добрыя пасылы ад Зяленскага”: Кавалеўскі пра адносіны з Кіевам

01/06/2023 - 15:40

“Мы бачылі добрыя пасылы з боку прэзідэнта Украіны Уладзіміра Зяленскага і ад некаторых іншых афіцыйных прадстаўнікоў Украіны” / фота Аб'яднанага пераходнага кабінета

“Мы бачылі добрыя пасылы з боку прэзідэнта Украіны Уладзіміра Зяленскага і ад некаторых іншых афіцыйных прадстаўнікоў Украіны” / фота Аб'яднанага пераходнага кабінета

Дзверы перад беларускімі дэмсіламі у Кіеў пачалі адчыняцца ўжо некаторы час таму, кажа намеснік Святланы Ціханоўскай у Аб’яднаным пераходным кабінеце Валер Кавалеўскі.

Візіт ва Украіну Паўла Латушкі спрычыніцца да падвышэння ўзроўню палітычных адносінаў паміж дэмакратычнай супольнасцю і Украінай, лічыць ён.

— Мы бачылі добрыя пасылы з боку прэзідэнта Украіны Уладзіміра Зяленскага і ад некаторых іншых афіцыйных прадстаўнікоў Украіны.

І дадам, што камунікацыя з украінскімі ўладамі ў нас ідзе на розных узроўнях і ў розных краінах. Гэта камунікацыя досыць эфектыўная і пастаянная. Тут мы кажам і пра Вярхоўную раду, і пра дыпламатычны корпус Украіны. Варта дадаць і што ў нас досыць актыўныя сувязі з экспертнай супольнасцю, з медыясупольнасцю.

Гэтыя адносіны працягваюцца на розных узроўнях, і кожны такі кантакт набліжае нас да падвышэння ўзроўню палітычных адносінаў паміж дэмакратычнай супольнасцю і Украінай. І думаю, што візіт Паўла Латушкі ва Украіну таксама да гэтага спрычыніцца.

Цяжка казаць, што Павел Латушка прадстаўляў у Кіеве усе дэмсілы — гэта надта шырокае паняцце, прызнае Кавалеўскі. Найперш ён гаварыў з Кіевам ад імя Аб’яднанага пераходнага кабінета і НАУ.

— Мы даўно вырашылі, што падтрымка Украіны — наш прыярытэт.

Мы супрацоўнічаем з Украінай найперш праз сінхранізацыю пэўных камунікацыйных пасылаў. Каб знайсці больш практычныя праекты, патрэбны іншы ўзровень адносінаў. Але калі яны будуць, мы будзем пра іх інфармаваць.

Раней і сам Кавалеўскі неаднаразова наведваў Украіну. Мы запыталіся, чаму гэтыя паездкі прыпыніліся.

— Ведаеце, добрае пытанне. Гэта не звязана з узроўнем адносінаў, проста ў нас шмат справаў на іншых кірунках.

Мы вядзем працу над стварэннем стратэгічнага дыялогу з ЗША, важнае месца займае праца над парадкам дня ААН — трэба спыніць абранне Аляксандра Лукашэнкі ў Раду Бяспекі. З ЕС у нас таксама фармалізуюцца адносіны. Ствараецца кансультацыйная група, і яе першая сустрэча адбудзецца напрыканцы чэрвеня. Там мы будзем абмяркоўваць стан адносінаў паміж дэмакратычнай Беларуссю і ЕС.

Усё гэта адымае шмат часу і, на вялікі жаль, пакуль не дазваляе ехаць ва Украіну.

Але Кавалеўскі дадаў, што літаральна праз два тыдні будзе мерапрыемства ў Кіеве, і падчас гэтай паездкі ён не выключае і сустрэч з палітычнымі структурамі.