Нацыянальным гістарычным архівам паставілі кіраваць экс-кадэбіста
Міхаіл Глушакоў / НГАБ
У Нацыянальным гістарычным архіве прызначылі новага дырэктара. 14 жніўня ўстанову ўзначаліў Міхаіл Глушакоў.
Калектыву на агульным сходзе яго прадставіў дырэктар Дэпартамента архіваў і справаводства Мінюста Алег Воінаў.
Глушакоў нарадзіўся ў Мінску ў 1972 годзе. У 1994 годзе скончыў Беларускі дзяржаўны тэхналагічны ўніверсітэт. Як піша "Наша Ніва", ён доўгі час служыў у КДБ.
Да прызначэння дырэктарам Гістарычнага архіва Глушакоў некалькі месяцаў працаваў кансультантам у аддзеле арганізацыйнай работы, інфармацыі і выкарыстання дакументаў Дэпартамента архіваў і справаводства.
Дарэчы, папярэдні дырэктар архіва таксама быў сілавіком. Гэта быў генерал-маёр Алег Воінаў, які перад прызначэннем у архіў займаў пасаду памочніка міністра абароны. Яго прызначылі ў архіў у траўні 2022-га. А ўжо ў студзені 2023-га павысілі да кіраўніка Дэпартамента архіваў і справаводства.
За апошні год з Нацыянальнага гістарычнага архіва звольнілі каля 15 супрацоўнікаў.
