Над Чорным морам сутыкнуліся расійскі СУ-27 і амерыканскі дрон MQ-9
СУ-27 / wikimedia.org
Расійскі знішчальнік СУ-27 сутыкнуўся з амерыканскім беспілотнікам-разведчыкам MQ-9 над Чорным морам, паведамляе BBC News. Сцвярджаецца, што беспілотнік упаў у міжнародныя воды.
Еўрапейскае камандаванне Узброеных сіл ЗША назвала дзеянні экіпажа расійскага Су-27 "безразважнымі і некампетэнтнымі". Паводле іх, два расійскія СУ-27 ажыццявілі "небяспечны і непрафесійны" перахоп дрона. Прычым адзін з самалётаў ударыў па вінту беспілотніка.
Каментуючы гэты выпадак, камандуючы ВПС ЗША ў Еўропе і Афрыцы генерал Джэймс Хекер падкрэсліў, што самалёты ЗША і саюзнікаў працягнуць ажыццяўляць палёты ў міжнароднай паветранай прасторы ў адпаведнасці з міжнароднымі законамі.
Дзеянні расійскага экіпажа ён ахарактарызаваў як агрэсіўныя і небяспечныя. На думку Хекера, яны "могуць прывесці да праліку і ненаўмыснай эскалацыі".
