Наркадылер не змог змыць наркотыкі ва ўнітаз, каб пазбавіцца доказаў віны (фота)

На днях супрацоўнікі наркакантролю УУС Мінскага аблвыканкама разам з калегамі з Мінскага РУУС затрымалі двух закладчыкаў наркотыкаў. Абодва яны арандавалі жыллё ў Мінску, а закладкі з наркотыкам рабілі на тэрыторыі сталіцы і Мінскага раёна, паведамляе uvd-mo.gov.by.

Адным з закладнікаў быў 24-гадовы экспедытар адной з крамаў. Малады чалавек спісаўся з адной з крамаў па гандлі наркотыкамі. Закладкі рабіў у лесапаркавай зоне Заводскага раёна Мінска і прылеглай тэрыторыі Мінскага раёна. У адной з яго хованак аператыўнікі знайшлі скрутак з альфа-PVP масай больш за 20 грам. Пазней былі выяўленыя яшчэ каля 30 хованак з разавымі дозамі наркотыку. На мужчыну пачалі крымінальную справу, яму пагражае да 15 гадоў пазбаўлення волі.

Другі закладчык — 25-гадовы непрацуючы жыхар Мінска. Раней малады чалавек быў ужо судзімы за ўхіленне ад прызыву ў войска. У яго дома і амаль у 20 хованках на тэрыторыі Ленінскага раёна Мінска праваахоўнікі знайшлі больш за 45 грамаў гашышу і 5 грамаў альфа-PVP.

Затрымлівалі яго байцы спецатрада хуткага рэагавання (САХР) на арандаванай кватэры. У жыллі стаялі моцныя металічныя дзверы, таму затрымліваць маладога чалавека вырашылі пры выхадзе з кватэры. Хлопец выходзіў са сваёй дзяўчынай, якая ішла першай і заўважыла байцоў САХР. Дзяўчына папярэдзіла свайго спадарожніка пра міліцыю і паспрабавала сабой перакрыць доступ у кватэру. Гэтых некалькіх секундаў маладому чалавеку было дастаткова, каб выкінуць ва ўнітаз некалькі пакуначкаў з наркотыкам, падрыхтаваных да закладкі. Ён хацеў змыць наркотык, але напярэдадні гаспадар перакрыў зліўны бачок унітаза, бо той пачаў працякаць.

Акрамя гэтых пакункаў праваахоўнікі знайшлі скруткі з наркотыкамі яшчэ ў некалькіх месцах у кватэры. На маладога чалавека пачалі крымінальную справу за захоўванне наркотыкаў. Але з улікам таго, што аператыўнікі знайшлі закладкі, якія ён зрабіў, справу перакваліфікуюць у незаконны абарот наркотыкаў з мэтай збыту.