Найбуйнейшая партыя Еўрапарламента не будзе прызнаваць "выбары" ў Беларусі

Еўрапейская народная партыя (ЕНП) не будзе прызнаваць "выбары" ў Беларусі. Пра гэта гаворыцца адмысловай рэзалюцыі ЕНП, прынятай 14 студзеня па выніках палітычнай асамблеі партыі.

Цяперашнія "прэзідэнцкія выбары" ў дакуменце называюцца фарсам. ЕНП заяўляе, што не прызнае іх, як не прызнала выбары 2020 года, "якія прывялі да неверагоднай эскалацыі гвалту рэжыму супраць уласнага народа".

У рэзалюцыі тлумачацца прычыны такога рашэння: "Кандыдатам ад апазіцыі забаронена ўдзельнічаць у выбарах, свабода СМІ жорстка абмежаваная, выбарцы зазнаюць запалохванне, незалежнае назіранне за выбарамі адсутнічае. Еўрапейская народная партыя недвухсэнсоўна заяўляе, што гэтыя "выбары" нельга лічыць свабоднымі ці справядлівымі".

Таксама ЕНП асуджае працяглыя рэпрэсіі ў Беларусі і нагадвае пра палітвязняў. У тэксце рэзалюцыі гаворыцца, што напярэдадні так званых "выбараў" у Беларусі працягваюцца рэпрэсіі і новыя арышты.

ЕНП заяўляе пра сваю падтрымку народа Беларусі "ў яго барацьбе за сувэрэнную, дэмакратычную і квітнеючую Беларусь".