Па справе аб падпале дома Гайдукевіча затрымалі больш за 20 чалавек
Па справе аб падпале дома дэпутата Палаты прадстаўнікоў Алега Гайдукевіча КДБ затрымаў больш за 20 чалавек, паведаміў тэлеканал СТБ.
Асноўныя падазраваныя барысаўская сям'я Вацяховічаў. Як вынікае з тэлесюжэту, сачыць за імі пачалі яшчэ да нападу на дом Гайдукевіча. Прадстаўнікі спецслужбаў паведамілі, быццам Вайцяховічы планавалі напады не толькі на Гадукевіча, але і на вядоўцаў дзяржаўных тэлеканалаў, былых і дзеючых супрацоўніка сілавых структур, а таксама суддзяў. "У якасці магчымых спосабаў учынення тэрактаў яны разглядалі знішчэнне маёмасці пералічаных асоб шляхам падпалу альбо іх выкраданне і катаванні з мэтай запісу так званых пакаянных відэа", — кажа намеснік начальніка следчага ўпраўлення КДБ Канстанцін Бычак.
Вайцяховічам, па яго словах, дапамагалі іншыя: кур'еры, якія перадавалі грошы, людзі, якія вялі назіранне, рэкагнасцыроўку на мясцовасці, давалі апаратуру для "запісу тэрарыстычных актаў і перадачы гэтых відэазапісаў замежным заказчыкам".
Паведамляецца, што спецслужбы выявілі Вайцяховічаў, калі тыя паставілі трэкер на машыну міліцыянта. Пасля гэтага за барысаўскай сям'ёй сачылі. І ў дзень нападу на дом Гайдукевіча, маўляў, былі прынятыя меры па "недапушчэнні знішчэння маёмасці Гайдукевіча і прычыненні шкоды яго жыццю і здароўю".
