Палітзняволены журналіст Сяргей Сацук асуджаны на 8 гадоў калоніі
Сяргей Сацук у судзе / БЕЛТА
Палітзняволены журналіст Сяргей Сацук асуджаны на 8 гадоў калоніі ўзмоцненага рэжыму (як і хацеў дзяржаўны абвінаваўца). Яго прызналі вінаватым па трох артыкулах Крымінальнага кодэксу: "атрыманне хабару, здзейсненае ў буйным памеры", "распальванне іншай сацыяльнай варожасці" і "перавышэнне ўлады альбо службовых паўнамоцтваў". Ён мусіць заплаціць штраф — 16 тысяч рублёў. Суд вырашыў таксама спагнаць з абвінавачанага ў даход дзяржавы грашовую суму ў памеры 12384 рублёў.
Рэдактара партала ej.by Сацука затрымалі ў снежні 2021 года. Яго крымінальную справу разглядаў Мінскі гарадскі суд.
Праваабаронцы нагадваюць, што справу Сацука з 23 верасня разглядала суддзя Святлана Бандарэнка. Менавіта яна адправіла за краты журналістку TUT.ВY Кацярыну Барысевіч за матэрыял пра смерць пратэстоўца Рамана Бандарэнкі.
Сяргей Сацук — журналіст-расследвальнік. Пасля затрымання яго калегі выказалі думку, што гэта адбылося праз расследаванні — у тым ліку аб карупцыі ў медыцынскай сферы. Беларускія праваабаронцы прызналі Сацука палітвязнем.
