Пасля ператрусаў у кампаніі "Кентаўр" заблакавалі рахункі ў Белгазпрамбанку

У чацвер, 11 чэрвеня, ператрусы прайшлі не толькі ў галоўным офісе Белгазпрамбанка. Супрацоўнікі Дэпартамента фінансавых расследаванняў пабывалі ў офісах кампаній: "ПрыватЛізінг", "Кампары" і "Кентаўр".

Пакуль нікому з супрацоўнікаў і ўладальнікаў кампаніі не прад'яўлялі абвінавачванне. Падчас ператрусаў у страхавой канфіскавалі дакументы па фарміраванні статутнага фонду, пратаколы сходу акцыянераў, базу па бухгалтарскаму ўліку і тэхніку.

Дэпартамент фінансавых расследаванняў распачаў дзве крымінальныя справы, па артыкуле "Легалізацыя сродкаў, здабытых злачынным шляхам у асабліва буйным памеры" і "Ухіленне ад выплаты падаткаў у асабліва буйным памеры". Па справе затрыманыя 15 чалавек: топ-менеджэры Белгазпрамбанка, а таксама былыя супрацоўнікі, якія цяпер працуюць у розных кампаніях.

За шмат гадоў свайго існавання Белгазпрамбанк арганізаваў цэлую сетку контрагентаў з разнастайных кампаній. Кампаніі-контрагенты ўзніклі або сталі працаваць з Белгазпрамбанкам у той перыяд, калі Віктар Бабарыка быў кіраўніком праўлення банка. Еўрарадыё разбіралася як усе гэтыя фірмы паміж сабой звязаныя.