Польшча не дапусціць беларусаў і расіян на чэмпіянат Еўропы па скачках у ваду
Скачкі ў ваду / pixabay.com
Польшча не дапусціць беларусаў і расіян на чэмпіянат Еўропы па скачках у ваду, які павінен прайсці ў гэтай краіне ў 2027 годзе.
Так Польская федэрацыя плавання адрэагавала на рашэнне World Aquatics (Міжнароднай федэрацыі водных відаў спорту) дапусціць спартоўцаў з РФ і РБ да міжнародных турніраў пад дзяржаўным сцягам і гімнам.
"Што да чэмпіянату Еўропы па скачках у ваду, які адбудзецца ў Польшчы ў 2027 годзе, я паведаміла ўладам Еўрапейскай федэрацыі, што — калі, вядома, не зменіцца ваенная сітуацыя — мы не дапусцім да спаборніцтваў спартсменаў з Расіі і Беларусі", — перадае Польскае радыё словы прэзідэнткі польскай федэрацыі Атыліі Енджэйчак.
Спартоўцы Расіі і Беларусі трапілі пад міжнародныя санкцыі пасля пачатку шырокамаштабнага расійскага ўварвання ва Украіну ў 2022 годзе. Аднак гэтыя санкцыі паступова змякчаюцца.
