Польскі актор каля Варшавы затрымаў нецвярозага кіроўцу-беларуса
Актор Адрыян Клос спыніў п'янага кіроўцу / Адрыян Клос
13 верасня на дарозе пад Варшавай польскі актор Адрыян Клос затрымаў нецвярозага кіроўцу "Нісана", піша Wirtualna Polska.
"Нісан" выехаў на сустрэчную паласу, урэзаўся ў астравок пасярэдзіне скрыжавання, а потым няўпэўнена паехаў далей.
Клос заблакаваў шлях падазронаму аўтамабілю. Калі ён адчыніў дзверы Nissan, адтуль рэзка пахнула алкаголем. Кіроўца вырашыў уцячы і пабег у бок бліжэйшага лесу. Актор дагнаў і спыніў яго, а неўзабаве на дапамогу прыйшлі іншыя кіроўцы і выклікалі паліцыю.
Затрыманы мужчына прапаноўваў актору буйную суму, каб той яго адпусціў.
Пасля прыезду паліцыі высветлілася, што нецвярозы кіроўца — грамадзянін Беларусі.
