Праход на фінал ЧС па хакеі ― 450$. Усе гульні беларусаў у групе ― 750$

Простыя заўзятары, якія не кінуліся купляць квіткі на хатні чэмпіянат па хакеі ў першы ж дзень, засталіся з дуляй. Ухапіць жаданыя праходкі змаглі толькі тыя, хто ў першы ж дзень атакаваў білетныя касы, як абменнікі падчас крызісу 2011 года.

А сёння, калі верыць білетнаму аператару Ticketpro, няма квіткоў ні на фінал, ні на гульні групавой стадыі з удзелам зборнай Беларусі. Раскуплены нават абанементы, што ўключаюць гульні нашай зборнай плюс чвэрцьфінал, паўфінал і фінал (каштавалі ад 2 да 13,8 мільёна рублёў).

Для простых смяротных на раніцу чацвярга 28 лістапада засталіся толькі цікеты на матч з Казахстанам (за 416 тысяч рублёў). 

“Засталіся і на паўфінал. Добрыя, непадалёк ад цэнтра. За 1430000, 1950000 і 1690000 рублёў”, ― паведамляе супрацоўніца білетнага аператара.  

Але хто трапіць у чвэрцьфіналы і паўфіналы і ў якіх парах згуляе ваша каманда ― таямніца. Таму і квіткі дзе-нідзе на гэтую турнірную стадыю засталіся.  

Збоку ўвесь гэты білетны ажыятаж выглядае падазроным. Канкрэтных лічбаў па выдзеленых квітках таксама не прадастаўляюць.  

“Такога, што іншаземцам дасталася больш білетаў, чым беларусам, няма, ― сцвярджае Еўрарадыё менеджар па білетнай праграме чэмпіяната свету-2014 Антон Кузьміч. ― Квіткі, хутчэй за ўсё, былі хутка раскуплены. Таксама частка білетаў была аддадзена тураператару ― “Цэнтркурорту”. Але калі тыя квіткі застануцца, яны вернуцца на рэалізацыю да білетнага аператара. Многія людзі, калі меркаваць па каментарах у інтэрнэце, купілі квіткі, але, відаць, не ўсім дасталася. Час, калі стартаваў продаж квіткоў, быў вядомы з дакладнасцю да гадзіны. У касах былі чэргі, людзі куплялі…”

Калі ўжо набыць квіткі на матчы зборнай Беларусі і фінал звычайнымі метадамі немагчыма, звяртаемся ў адно з прадстаўніцтваў “Цэнтркурорта” ў якасці турыстаў. Просімся ў складзе групы з васьмі чалавек у Мінск на сем матчаў зборнай Беларусі ў межах групавой стадыі.

Заяўляем самыя бюджэтныя месцы дзе-небудзь за варотамі і самае таннае размяшчэнне  у фан-вёсцы, куды пасля чэмпіянату пераселяцца звычайныя студэнты.  

“Вось у мяне атрымалася ― 5979$ на васьмярых. Сюды будуць уключаны квіткі на матчы, размяшчэнне, праязныя і нейкія сувеніры”, ― падлічыла супрацоўніца “Цэнтркурорта”.

То бок атрымліваецца прыкладна 750$ на чалавека. І гэта самы танны варыянт, без даезду да Мінска, харчавання і ўсялякіх забаваў.

Просім арганізаваць для нас такі самы бюджэтны пакет, але на чвэрцьфінал, паўфінал і фінал.

“Атрымліваецца 7031$ за ўсю групу”, ― скончыла падлікі аператарка.

На аднаго чалавека атрымалася каля 880 долараў. І гэта самыя ніжнія месцы за варотамі. І невядома, хто канкрэтна будзе гуляць у гэтых матчах. Сумы хапіла б, да прыкладу, каб пераляцець з Мінска ў Рыа-дэ-Жанейра на добрых авіялініях.

Намякаем, што наша сярэдняя зарплата ― 500$. Таму просім супрацоўніцу “Цэнтркурорта” падабраць пакетную прапанову на фінал. Праўда, замаўляем больш-менш добрыя месцы і трохзоркавы гатэль.

Аператарка знайшла для нас месца ў сектары М (не самы выгадны для прагляду варыянт, але лепшы, чым за варотамі). З размяшчэннем у гатэлі “Спадарожнік” атрымалася 3638$ на групу. То бок на аднаго чалавека ― каля 450$.

“Такія пакеты купляюць не толькі замежнікі. Беларусы таксама  не адстаюць. Калі яшчэ будзе такая магчымасць паглядзець чэмпіянат у сябе дома!” ― развіталася з намі аператарка “Цэнтркурорта”.

Для многіх беларусаў названыя сумы ― раскоша. Але ў кожным разе ніхто не застанецца ў пралёце. Можна будзе глядзець матчы па ТБ і любавацца на вуліцах Мінска зубром Валерам ― сімвалам чэмпіяната свету-2014.