Пры дапамозе Еўрарадыё з палону вызваленыя 8 украінскіх вайскоўцаў

Нечаканы працяг атрымлівае інтерв’ю Еўрарадыё з прэм’ер-міністрам так званай ДНР Аляксандрам Захарчанкам, апублікаванае 9 верасня. Праз два дні, вечарам 11 верасня, да карэспандэнта Еўрарадыё звярнуўся валанцёр з Херсона Дзмітрый Углач, супрацоўнік Херсонскага абласнога Фонда міласэрднасці і здароўя з нечаканай просьбай: скарыстацца “знаёмствам” з Аляксандрам Захарчанкам і папрасіць яго вызваліць украінскіх вайскоўцаў, якія знаходзяцца ў палоне ў сепаратыстаў ДНР і ЛНР.

Паспрабаваць сябе ў якасці перамоўшчыка? Чаму б і не, калі нашы ўкраінскія калегі-журналісты цяпер актыўна займаюцца валанцёрствам — збіраюць грошы на набыццё касак, бронекамізэлек… Ужо на наступны дзень, 12 верасня, журналіст Еўрарадыё Зміцер Лукашук тэлефануе ў Данецк.

Еўрарадыё: Пасля вашага інтэрв’ю нашаму радыё да нас звярнуліся людзі з Украіны з просьбай пасадзейнічаць праз вас у вызваленні палонных украінскіх вайскоўцаў. Ці можам мы на такім узроўні паспрабаваць дапамагчы людзям?

Аляксандр Захарчанка: Ну, што ў гэтай сітуацыі я магу сказаць… Мы і так іх адпускаем усіх. Адзінае, што вы можаце… Вялікі там спіс? Восем чалавек? Ладна, давайце, прозвішчы дыктуйце.

Еўрарадыё: Пачнём з параненага: Чыгін Назар Міхайлавіч, 1985 года нараджэння, патрапіў у палон ў раёне Луганскага аэрапорта, паранены ў шыю, утрымліваецца ў будынку СБУ…

Аляксандр Захарчанка: У СБУ ў Луганску? Гэта не мая рэспубліка — я перадам ім просьбу, але нічога не абяцаю. Давайце далей.

Еўрарадыё: У раёне Савур-магілы ў палон трапіў Лемяшчук Іван Міхайлавіч, 1993 года нараджэння, баец 80-й аэрамабільнай брыгады. Дзе ўтрымліваецца, не вядома. А вось, дзе ўтрымліваецца Пакумейка Руслан Іванавіч вядома — у баявіка Матаролы. З якой ён часткі не ўказана.

Аляксандр Захарчанка: Ага, вось так вось! Гэта могуць быць нейкія тэрытарыяльныя батальёны, альбо які “Азоў” ці “Днепр”. Ну, ладна, давайце далей.

Еўрарадыё: Малашняк Андрэй Уладзіміравіч, дзе служыў, не ўказана, 1984 года, са Львова. Літвін Міраслаў Багданавіч, таксама 1984 года, з Львоўскай вобласці. Кузьмін Міхаіл Сцяпанавіч, 1994 года нараджэння, з вайсковай часткі №…, знік 5 верасня 2014 года (у дзень, калі было аб’яеленае перамір’е пасля чарговага раунду “мінскіх перамоў” кантактнай групы — Еўрарадыё) падчас абстрэлу ў раёне населеных пунктаў Металіст і Вясёлая Гара.

Каліноўскі Павел Аляксандравіч, 1990 года нараджэння. Пра яго вядома толькі, што знік пасля 18 гадзін (калі было аб’яўлена пра спыненне агню — Еўрарадыё) 5 верасня.

І Алег Пяртак, пра якога вядома толькі, што яму каля 50 гадоў і што ён таксама з Львоўскай вобласці.

Аляксандр Захарчанка: Па частцы спісу — да луганчан, таму нічога не абяцаю. На першы погляд, з гэта спісу толькі двое ў маёй зоне адказнасці. Іх мне прасцей будзе знайсці, а ўсіх астатніх перадам у Луганск, тут я нічога не абяцаю. Ну, давайце, я зараз дам заданне і стэлефануемся заўтра раніцай. Калі я іх знайду, то афіцыйна іх адпушчу па вашай просьбе, на сваіх абмяняю і ўсё — мама-тата, будзьце задаволеныя, дзякуй, што дазваніліся. Вы ў мяне зможаце ўзяць інтэрв’ю па гэтым пытанні, што дзякуючы нашым сябрам з Мінска… Званіце мне заўтра аб 11 гадзіне.

                                     Аляксандр Захарчанка

Размова пакінула ўражанне, што вызваленне з палону хаця б некалькіх чалавек са спісу цалкам магчымае. Праўда, чаканне вынікаў перамоў зацягваецца: дазваніцца Аляксандру Захарчанку атрымліваецца толькі ў 11.40, і ён коратка кажа, што гаварыць зможа толькі праз 1.5-2 гадзіны. Дзве гадзіны нервовага чакання з кавай і ў пастаяннай перапісцы з не менш знерваванымі ўкраінскімі сябрамі, якія таксама чакаюць. Станоўчага выніку ў той дзень не атрымліваем.

Аляксандр Захарчанка: Перадаў на Луганск вашы прозвішчы і імёны, сёння павінны дакласці зводку па тых, хто знаходзіцца ў нас. У Данецку я дакладна ведаю, што іх няма. Зараз па ўсіх гарнізонах пройдуць і, думаю, што раніцай наступнага дня зводку па гэтых палонных дадуць. А ў Данецку — гэта бліжэй за ўсё і сувязь нармальная: у нас тут тры пункты, дзе затрыманыя сядзяць, праверылі ўсе тры месцы… Тут жа сітуацыя якая — яны ж стараюцца не называць свае імёны, у гэтым праблема. Калі пачынаеш выкрыкваць перад строем, яны могуць проста прамаўчаць. Але як толькі іх знайду, адразу званю вам і вы можаце званіць сваякам, што іх знайшлі, што яны пад наглядам, што яны асобна ўзятыя “на аловак”, таму ў бліжэйшы абмен іх адразу памяняюць.

Цягам гэтай ночы чакання журналісту Еўрарадыё перадаюць яшчэ адзін спіс з імёнамі палонных, якіх было б пажадана выцягнуць як мага хутчэй. Па розных прычынах. Імёны ў спіс з 7 чалавек ўносілі розныя людзі: як сваякі і валанцёры, так і камандзіры палонных байцоў. Але гэтым разам просьба Еўрарадыё сустракае зусім іншую рэакцыю.

Аляксандр Захарчанка: Я скажу шчыра: у нас ёсць цэлая камісія па гэтым пытанні. Дык вось, я па вашым спісе прайшоўся і аддаў (просьбу вызваліць тых, хто знаходзіцца ў палоне ў ЛНР — Еўрарадыё). Магу вывесці на чалавека, які за гэта адказвае, і вы з ім можаце канкрэтна гаварыць па ваеннапалонных. Там ёсць моманты, калі ўжо ў спісе на чаргу альбо просьбы камандзіраў абмяняць таго на таго. Не ўсё так проста — узяў ды памяняў. Яны ледзь-ледзь дамовіліся пра асаблівую сістэму і не вельмі хочацца яе парушаць. Блытаніна ў гэтых рэчах не зусім патрэбная. А другое: проста зразумейце правільна, ёсць розныя ваеннапалонныя. Ёсць артылерысты, ёсць снайперы, ёсць людзі, якія па неасцярожнасці сваёй альбо глупству ўдзельнічалі, бралі ўдзел у расстрэлах карных, гэта ўсё здымалі на відэа і гэта відэа таксама ёсць… Просяць чамусьці звычайна за іх.

Не дапамагаюць нават словы пра тое, што вызваленне палонных па просьбе беларускіх журналістаў добра б выглядала напярэдадні чарговай сустрэчы кантактнай групы па ўрэгуляванні канфлікту ва Украіне, што пройдзе ў Мінску (Аляксандр Захарчанка браў удзел у першых двух пасяджэннях — Еўрарадыё). У выніку мы дамаўляемся, што калі людзі знойдуцца і іх занясуць у спіс на абмен, альбо калі іх хутка абмяняюць, то Аляксандр Захарчанка скіне мне смс. У адваротным выпадку звязваемся ў панядзелак 15 верасня а 10 раніцы.

СМС з Данецка да мяне так і не дайшла. Цягам усяго панядзелка Аляксандр Захарчанка ўпарта скідвае званкі з офіса Еўрарадыё. Людзей не знайшлі? Яны не дажылі да вызвалення з-за ран ці якіх іншых прычын? Не хочуць іх мяняць? Адказаў няма. І толькі а 22 гадзіне радаснае паведамленне з Херсона: “Траіх з нашага спісу вызваляюць сёння а 23 гадзіне!”.

А пазней высвятляецца, што на самой справе, вызваляюць усіх (!) з першапачаткова спісу, што я перадаў Аляксандру Захарчанку. Больш за тое, па словах валанцёра Дзмітрыя Углача, гэта быў не абмен, а проста вызваленне.

Дзмітрый Углач: “Хлопцы нашы, хлопцы знайшліся і ўсіх цяпер, параненыя ці не, вязуць у Днепрапятроўск. Прычым, гэта быў не абмен — іх проста адпусцілі!”.

Цікавыя два моманты: па словах Дзмітрыя Углача, трое з гэтых васьмі чалавек былі ў спісе вайскоўцаў, якія загінулі на Данбасе. Апроч таго, адпаведным службам ва Украіне было вядома, што херсонскі валанцёр Дзмітрый Углач спрабуе па ўсіх магчымых каналах дамагчыся вызвалення канкрэтных людзей.

Дзмітрый Углач: “Мне ўжо пазванілі пэўныя… асобы і цікавіліся, якім чынам я дамаўляўся пра вызваленне гэтых людзей. Я сказаў, што не ведаю, ці на самой справе яны супрацоўнікі, такой інфармацыяй па тэлефоне дзяліцца не буду. І калі хочуць нешта высветліць, то ў Херсоне ёсць падраздзяленне контрвыведкі — няхай афіцэр з пасведчаннем да мяне падыдзе і я патлумачу, якім чынам мы гэта рабілі”.

Ці сапраўды гэтыя 8 ваенных выйшлі на свабоду дзякуючы звароту журналіста Еўрарадыё? Цалкам магчыма. Як магчыма і тое, што яны і так былі ўнесеныя ў спісы на абмен-вызваленне, проста так супала. Альбо, што нехта іншы за іх прасіў па іншых каналах і вызваленне адбылося, а Захарчанка і Еўрарадыё тут ні пры чым. У дадзеным выпадку больш важна тое, што людзі выйшлі з палону. І мы ўсё адно паспрабуем прасіць, карыстаючыся “знаёмствам” з Аляксандрам Захарчанкам, за тых ваеннапалонных, якія пералічаныя ў другім перададзеным нам спісе.

Дарэчы, мы абяцалі Аляксандру Захарчанку, што па факце вызвалення палонных зробім з ім яшчэ адно інтэрв’ю. Еўрарадыё слова трымае, інтэрв’ю будзе ўжо заўтра. Больш за тое, мы лічым неабходным пайсці далей і абяцаем інтэрв’ю з адным з вызваленых палонных з “нашага” спісу.

Фота: news.bigmir.net,  Reuters