Пры ўездзе ў Літву кіроўцаў грузавікоў абавяжуць дэклараваць паліва ў баках
Фуры, ілюстрацыйнае фота
Пры ўездзе ў Літву кіроўцы грузавікоў з 12 сакавіка будуць абавязаныя дэклараваць колькасць паліва ў баках. Пра гэта паведамляе літоўская мытня.
Новая мера закране грузавікі, якія заязджаюць у Літву праз беларускую мяжу (пункты пропуску "Мядзінінкай" і "Шальчынінкай"), а таксама праз мяжу з расіяй (пункт пропуску "Кібартай").
Літоўскія мытнікі кажуць, што кіроўцы грузавікоў, якія ідуць праз краіну транзітам, нярэдка едуць дзіўнымі маршрутамі і нелегальна зліваюць паліва з бакаў. За адну такую паездку адзін грузавік можа зліць ад 800 да 1000 літраў дызпаліва, якое потым трапляе на чорны рынак. Літоўскія праваахоўнікі злавілі на гарачым некалькі кіроўцаў фур з Расіі.
Шкода для Літвы ад незаконнага зліву паліва, паводле ацэнак мытнікаў, можа дасягаць 20 мільёнаў еўра ў год.
