Пуцін абавязаў украінцаў у акупаваных абласцях атрымаць пашпарты РФ ці з'ехаць

Да 10 верасня грамадзяне Украіны абавязаныя ўзаконіць сваё перабыванне на тэрыторыі Расіі ці пакінуць краіну. Адпаведны ўказ падпісаў Уладзімір Пуцін.

Гэтая норма, як вынікае з тэксту дакумента, закранае ў тым ліку жыхароў Данецкай, Луганскай, Запарожскай і Херсонскай абласцей — украінскіх тэрыторый, акупаваных Расіяй.

У тыя ж тэрміны Мінздароўя Расіі абавязанае правесці медагляд грамадзян Украіны на наяўнасць ВІЧ, інфекцыйных захворванняў, якія ўяўляюць небяспеку для навакольных, а таксама на ўжыванне наркотыкаў і псіхатропаў.

Расійскія СМІ пішуць, што ў РФ з лютага дзейнічае рэжым высылкі нелегальных мігрантаў. Такім чынам украінцаў, якія пражываюць на акупаваных тэрыторыях і не сталі атрымліваць расійскія пашпарты, фактычна прыраўнялі да нелегальных мігрантаў.

Раней у СМІ з'яўляліся звесткі, што ўкраінцаў, якія на акупаваных тэрыторыях не атрымалі расійскія пашпарты, унеслі ў "рэестр кантраляваных асоб". Гэта база звестак МУС па замежніках, якія незаконна знаходзяцца ў краіне.

Адным з патрабаванняў Пуціна аб пачатку мірных перамоваў з Украінай, як паведамлялася, быў поўны вывад украінскіх войскаў з тэрыторый Луганскай, Данецкай, Запарожскай і Херсонскай абласцей, а таксама прызнанне іх расейскімі рэгіёнамі.