Рак у Харві Вайнштэйна і брытанскі пашпарт для Падынгтана — #ІхНоравы

22/10/2024 - 14:39

Міжнародныя навіны / @rubanau_collage

У Вялікабрытаніі так усім спадабаўся мядзведзік Падынгтан, што брытанскае МУС вырашыла выдаць яму пашпарт. Дарэчы, 8 лістапада ў кінатэатрах адбудзецца сусветная прэм'ера трэцяга фільма пра прыгоды Падынгтана.

Пра гэта і не толькі чытайце ў нашым штодзённым аглядзе міжнародных навін.

У Харві Вайнштэйна выявілі рак касцявога мозгу

72-гадоваму амерыканскаму кінапрадзюсару Харві Вайнштэйну дыягнаставалі хранічны міелоідны лейкоз — разнавіднасць раку касцявога мозгу, паведамляе NBC News са спасылкай на крыніцы.

Цяпер Вайнштэйн праходзіць курс лячэння ў турэмнай бальніцы на востраве Райкерс у Нью-Ёрку. Прадстаўнік прадзюсара адмовіўся ад каментароў.

"З павагі да прыватнага жыцця містара Вайнштэйна мы не будзем даваць далейшых каментароў", — заявіў Крэйг Ротфельд.

Апошні раз Вайнштэйн паўстаў перад судом у верасні. Яму былі выстаўленыя новыя абвінавачанні ў сексуальных злачынствах, экс-прадзюсар не прызнаў сябе вінаватым. Суд адбыўся неўзабаве пасля таго, як Вайнштэйн перанёс экстранную аперацыю на сэрцы.

У ліпені Вайнштэйн таксама быў шпіталізаваны праз "мноства праблем са здароўем", уключаючы дыябет, высокі ціск, стэноз пазваночнага канала, вадкасць у сэрцы і лёгкіх.

У 2020 годзе Вайнштэйна асудзілі на 23 гады па абвінавачанні ў згвалтаванні. У красавіку 2024 года апеляцыйны суд Нью-Ёрка адмяніў прысуд прадзюсару, вынесены ў 2020 годзе, і скіраваў справу на новы разгляд.

Мядзведзіку Падынгтану афіцыйна выдалі брытанскі пашпарт

Мядзведзіку Падынгтану выдалі брытанскі пашпарт, піша The Guardian са спасылкай на інтэрв'ю супрадзюсара Роба Сілвы выданню Radio Times.

"Мы напісалі ў Міністэрства ўнутраных спраў, пытаючыся, ці можам мы атрымаць дакумент, і яны сапраўды выдалі Падынгтану афіцыйны пашпарт — такі толькі адзін", — кажа Сілва, трымаючы дакумент з фатаграфіяй Падынгтана ўнутры. "Мы б не падумалі, што ў Міністэрства ўнутраных спраў ёсць пачуццё гумару, але яны напісалі ў пашпарце: "Мядзведзь".

Рак у Харви Вайнштейна и британский паспорт для Паддингтона — #ИхНравы

Мядзведзь Падынгтан / Studiocanal

The Guardian называе Падынгтана "адным з самых любімых і вядомых бежанцаў Вялікабрытаніі за дзве траціны стагоддзя", бо, згодна з легендай франшызай, мядзведзік родам з Перу. Менавіта туды ён выпраўляецца ў трэцяй частцы серыі фільмаў, каб знайсці сваю цётку Люсі.

Фільм "Прыгоды Падынгтана — 3" выйдзе ў сусветны пракат 8 лістапада. Таксама стваральнікі "Падынгтана" анансавалі здымкі чацвёртага фільма і серыяла пра прыгоды мядзведзіка.

У Warner Bros. паабяцалі, што серыял паводле "Гары Потэра" будзе глыбейшы, чым фільм

Старшыня і генеральны дырэктар Warner Bros. Television Group Чэнінг Дангі паабяцала, што новае шоу глыбей даследуе кнігі Джоан Роўлінг, чым фільмы.

Кіраўніца студыі падкрэсліла, што для яе праца з сусветам "Гары Потэра" была "неверагоднай марай": "Для мяне, як для вялікай прыхільніцы арыгінальных раманаў, гэты серыял — выдатная магчымасць даследаваць іх трохі глыбей, чым гэта можна зрабіць у двухгадзінным фільме. Гэта асноўная прычына, з якой мы выправіліся ў гэтае падарожжа".

Паводле Дангі, праца над праектам "ідзе поўным ходам". У прыватнасці, пішацца сцэнар, а ў Вялікабрытаніі і Ірландыі актыўна праводзяць кастынг на галоўныя ролі, пра старт якога HBO абвясціла ў пачатку верасня.

Серыял паводле "Гары Потэра" з'явіцца на экранах не раней за канец 2026 года або нават у 2027-м.

У Дзюсельдорфе накрылі банду, якая прадавала "піцу з какаінам"

Наркагрупоўка маскіравалася пад дастаўку піцы. Яны арганізавалі ўяўную "піцэрыю", дзе найбольшым попытам карыстаўся толькі адзін тавар пад нумарам 40 у меню — піца з какаінам, піша BILD. Наркаманы ведалі, што па сутнасці гэта азначае дастаўку самога наркотыку.

"Гэта была адна з самых прадаваных піц", — заявіў начальнік крымінальнай паліцыі Міхаэль Граф фон Мольтке. Таксама ў продажы былі "піцы" з марыхуанай. Калі вартавыя парадку наляцелі на кватэру 36-гадовага гаспадара "піцэрыі", той выкінуў з акна сумку з 1,6 кг какаіну, 400 г марыхуаны і 268 000 еўра наяўнымі.

Канфіскаваныя наркотыкі / BILD

Падчас далейшага расследавання знайшлі трох пастаўшчыкоў наркотыкаў і 12 іншых падазраваных. У аперацыі ўдзельнічалі 150 паліцэйскіх па ўсёй федэральнай зямлі Паўночны Рэйн-Вестфалія. Выяўленыя дзве плантацыі канабісу, канфіскаваная зброя, грошы і дарагія гадзіннікі.