Расія не выкарыстоўвала паветраную прастору Беларусі для нападу на Украіну
Пацярпелыя ад расійскага ўдару па Адэсе / ДСНС Украіны
Расія не выкарыстоўвала паветраную прастору Беларусі для нападу на Украіну 17 лістапада 2024 года. Нягледзячы на тое, што маніторынгавыя каналы раніцай паведамілі, што каля 07:30 некалькі ракет зайшлі ў Чарнігаўскую вобласць Украіны з Гомельскай вобласці Беларусі.
Гаворка ішла пра крылатыя ракеты Х-101/55, якія запускаліся бартамі Ту-95МС з Саратаўскай вобласці РФ і Каспійскага мора.
Аднак у маніторынгавай групы "Беларускі Гаюн" іншая інфармацыя: ні адна з КР Х-101 раніцай не пралятала над Беларуссю і не запускалася з тэрыторыі нашай краіны. А памылка звязаная з тым, што ракеты былі лакацыйна заўважаныя каля Чарнігава. І некаторыя крыніцы выказалі здагадку, што запуск/пралёт быў над беларускай тэрыторыяй.
Раніцай 17 лістапада Расія нанесла масіраваны ўдар па энергетычнай інфраструктуры Украіны. Паводле звестак Уладзіміра Зяленскага, былі запушчаны 120 ракет і 90 БПЛА, у тым ліку — дроны-пустышкі для перагрузкі сістэм СПА.
