Ратавальная праграма Захаду ад сусветнага крызісу правальваецца на вачах

Ужо некалькі дзён працягваецца падзенне коштаў на нафту. 12 студзеня на азіяцкіх біржах гатунак Brent прадавалі за 31,02 долара. На мінулым тыдні цэны страцілі каля 10%, абнавіўшы 12-гадовыя мінімумы. Гэтыя падзеі адбываліся на фоне абвалу кітайскіх фондавых рынкаў.

Ці сведчыць падзенне коштаў на нафту і абвал кітайскага рынку пра падзенне сусветнай эканомікі?

Паводле прагноза агенцтва Bloomberg, краінамі з найбольшым эканамічным заняпадам у 2016 годзе будуць Венесуэла, Бразілія, Грэцыя, Расія і Эквадор. ВУП гэтых краінаў чакае падзенне. Нізкі рост сёлета прагназуецца ў Аргенціне, Японіі, Харватыі, Фінляндыі і Швейцарыі. А шмат хто з гэтых краінаў, яшчэ 5-7 год таму быў лакаматывам сусветнай эканомікі.

Беларускі эканаміст Яраслаў Раманчук кажа, што цяпер мы з’яўляемся сведкамі правалу 8-гадовай стратэгіі Захада (у тым ліку МВФ і Сусветнага банка) па ратаванні сусветнай эканомікі ад так званай вялікай рэцэсіі. Галоўная прычына — вельмі грубыя памылкі ў манетарнай палітыцы і неразуменне прыроды грошай — іх зрабілі вельмі таннымі.

“Цяпер мы знаходзімся ў стане, калі танны “кэш” забіў усе рынкі нерухомасці, фондавыя пляцоўкі, рэсурсныя рынкі. З-за гэтага адна за адной, пачынаючы з краінаў, якія развіваюцца (Кітай, Расія, Аргенціна, Бразілія), дзяржавы пачынаюць уваходзіць у рэцэсію”, — кажа эканаміст.

Кітай

На думку Яраслава Раманчука, эканоміка Кітая цяпер церпіць крах. Так адбываецца таму, што мяжа развіцця такой мадэлі ўжо дасягнутая, далей трэба змяняць самі інстытуты развіцця і выводзіць дзяржаву з эканомікі. Ужо цяпер інвестары, якія займаюцца каштоўнымі паперамі ў краінах, якія развіваюцца, выходзяць з кітайскага рынку. У выпадку рэцэсіі цэны на рэсурсным рынку па ўсім свеце будуць зніжацца.

ЗША

Эканоміка ЗША, хоць і з’яўляецца самай канкурэнтназдольнай, ужо з наступнага года можа апынуцца на нулі ці сысці ў мінус. Працягласць рэцэсіі будзе залежаць ад таго, якой мадэлі будуць прытрымлівацца ва ўладзе (кенсіянства, рэйганаўская мадэль або тэтчэраўская).

“Але нават, калі амерыканская эканоміка знізіцца на 25%, то ўсё адно амерыканцы застануцца самымі забяспечанамі ў свеце людзьмі, не ўлічваючы якія-небудзь Манака ці Швейцарыю”, — прагназуе эканаміст і дадае, што калі нават эканоміка ЗША будзе падаць, яна будзе падаць апошняй.

Еўрасаюз

Эканоміка еўразоны ўжо часткова балансуе на мяжы рэцэсіі. Нямецкі экспарт сёлета будзе ў мінусе. А калі нямецкая эканоміка ўвойдзе ў стагнацыю, аголяцца і даўгавыя праблемы Італіі, Іспаніі, Партугаліі і Францыі. На думку эканаміста, калі ЕС не пачне структурных рэформаў, адставанне ад ЗША, а пасля і ад азіяцкіх краінаў, будзе павялічвацца. Таксама магчыма палярызацыя саюза — найбяднейшыя чальцы будуць працягваць бяднець. Але энерцыя ў гэтым утварэнні вялікая, таму і працэсы гэтыя зацягнуцца да 2020 года.

Беларусь

Калі падзенне расійскай эканомікі складзе -5 — -7%, а бараль нафты будзе каштаваць 20 долараў, гэта негатыўна паўплывае на выкананне бюджэтных дзяржпраграмаў — выплаты заробкаў і пенсій, кажа эканаміст. У такім выпадку падзенне нашай эканомікі можа дасягнуць 5%. У горшым выпадку — да 10%.

“Сярэдні заробак у снежні 2016 года будзе 250-270 долараў. Добра калі 300 (сёння сярэдні заробак складае 350 долараў у эквіваленце — заўв. рэд.). Ну і сярэдняя пенсія ў нас упершыню за многія гады стане менш за 100 долараў”, — прагназуе Яраслаў Раманчук. На яго думку падзенне рэальных даходаў складзе 10-15%.

На стан беларускай эканомікі сёлета будуць уплываць курс расійскага рубля, наяўнасць ці адсутнасць рэгулявання курса беларускай валюты, цэнавае рэгуляванне, поспех перамоваў з крэдыторамі.