Ахоўнік крамы ў Беластоку: Штодзень затрымліваем злодзея з Беларусі

130315_eurafokus.mp3

У інтэрв’ю БелТА генеральны консул Беларусі ў Беластоку Аляксандр Берабеня заявіў, што ў горадзе ўзрастае колькасць беларусаў, якія трапляюцца на крадзяжах.

Напрыклад, у беластоцкім Media Markt беларусы набываюць падарункавыя карты, якія дазваляюць зрабіць запрашэнні для шэнгенскай візы “на закупкі”, а разам з імі — набыць тавараў на пэўную суму.

Відавочна, што сюды прыязджае шмат грамадзянаў нашай краіны. Можа сярод іх ёсць і нядобрасумленныя?

“Раю звярнуцца ў паліцыю, калі яны дадуць такую статыстыку. Мы не даём такой інфармацыі, бо гэта службовая таямніца”, — суха адказвае на пытанне Еўрарадыё ахоўнік Media Markt.

У прэс-службе ўпраўлення паліцыі Падляскага ваяводства пра крадзяжы, здзейсненыя беларусамі, таксама нічога не гавораць.

Прэс-служба ўпраўлення паліцыі Падляскага ваяводства: “Такой статыстыкі няма. Калі справа тычыцца замежніка, то падраздзяленне, якое вядзе справу, перадае інфармацыю ў консульства. А ў статыстыцы ў нас няма размежавання па нацыянальнай прыкмеце, ёсць толькі здзейснены ўчынак”.

Працягваем абзвоньваць крамы. У галерэі Podlaska злодзеяў з Беларусі не заўважалі.

Галерэя Podlaska: “Мы не мелі такіх паведамленняў, я не чула пра такія інцыдэнты”.

Як, дарэчы, і ў галерэі “Zielone wzgórze”:

“За апошні год у нас не было зафіксавана ніводнага крадзяжу, звязанага з замежнікамі”.

А вось Auchan пацвердзілі павелічэнне колькасці злодзеяў з Беларусі. Якія, дарэчы, ужо даўно з’яўляюцца “кліентамі” аховы крамы.

Ахоўнік Auchan: “Сёння, гадзіну таму таксама злавілі грамадзяніна вашай краіны. Нёс дробную рэч — нейкія рамяні бяспекі. Як мінімум трапляецца адзін грамадзянін Беларусі штодзень. Колькі існуе крама, увесь час, у сярэднім такая лічба”.  

Паводле слоў ахоўніка, у асноўным, беларусы стараюцца выносіць нешта дробнае, коштам да 100 злотых (каля 31 долара).

У гандлёвых цэнтрах Бяла-Падляскі, куды таксама едзе шмат беларусаў на шопінг, за крадзяжамі нашы суайчыннікі заўважаныя не былі. У гандлёвым цэнтры Sas больш скардзяцца на чэчэнцаў і грузінаў. А ў Rywal выказваюць задавальненне вялікай колькасцю гасцей з Беларусі. І дадаюць, што ніводнага непрыемнага інцыдэнту з удзелам беларусаў за апошнія месяцы не было.

Фота: ngopole.pl