Дэлегатцы КР вынеслі “вотум недаверу”. Яна называе гэта знішчэннем палітычнага канкурэнта

Фракцыя Каардынацыйнай Рады “Еўрапейскі выбар” вынеслі вотум недаверу Аляксандры Мамаевай. Вотум патлумачылі “абгрунтаванымі перасцярогамі ў інтарэсах бяспекі.

“У сувязі з дадзеным рашэннем, далейшае прадстаўніцтва Аляксандры Мамаевай ад імя “Еўрапейскага выбару” не з'яўляецца магчымым”, — гаворыцца ў тлумачэнні, пададзеным ў тэлеграм-канале фракцыі.

Паводле Мамаевай, падчас унутранага абмеркавання ёй ставілі ў віну нібыта перасылку скрыншотаў закрытай перапіскі трэцім асобам, прысваенне вынікаў чужой працы і правядзенне кансультацый з іншымі фракцыямі без узгаднення.  Яна ўсе гэтыя абвінавачанні адмаўляе і кажа, што ніякіх доказаў ёй не паказалі.

— Ніякіх пагрозаў бяспекі з майго боку не было, абвінавачванні беспадстаўныя. На чым канкрэтна яны палягаюць, я не ведаю, бо мне не далі нармальна азнаёміцца з матэрыяламі справы. Магу сказаць, што ніякіх запісаў пасяджэнняў я ніколі не рабіла, а ніякія скрыны і персанальныя дадзеныя, сенсітыўную інфармацыю з чата “Еўрапейскі выбар” — не перасылала.

Мне падаецца, што гэта прыклад недапушчальнай палітычнай канкурэнцыі. Я з'яўляюся кіраўніцай Міжнароднай камісіі, кіраўніцай дэлегацыі дэмакратычных сілаў Беларусі ў ПАРЭ і магу сцвярджаць, што актыўна там працую на карысць дэмсілаў і Беларусі.

Наколькі я разумею сітуацыю — супраць мяне мэтанакіравана збіраліся нейкія сведкі, каб выключыць мяне з Каардынацыйнай рады і каб заняць маё месца ў спісе, а далей прэтэндаваць на маё месца ў міжнароднай камісіі і ў ПАРЭ, — кажа Мамаева ў каментары для Еўрарадыё.

Палітык дадае, што з моманту, як інфармацыя пра яе выключэнне стала публічнай, яна ўжо атрымала “некалькі прапановаў па супрацы ад КДБ”.

— То бок, яны ўжо намагаюцца выкарыстаць гэтую сітуацыю, каб дыскрэдытаваць працу Каардынацыйнай рады і Міжнароднай камісіі.

У каментары Еўрарадыё яна таксама кажа, што працэдура вотуму недаверу ў статуце Каардынацыйнай рады няма. Калі фракцыя хацела выключыць яе са спісу, паводле Мамаевай, яна магла зарабіць гэта толькі падчас агульнага пасяджэння Каардынацыйнай рады.

— Па статуце Каардынацыйнай рады, няма працэдуры вотуму недаверу. Выключыць мяне не можа ні фракцыя, ні спіс. Я магу ці выйсці сама — ці гэта можа зарабіць агульнае паседжанне Каардынацыйнай рады.

Але ў “Еўрапейскім выбары” былі размовы аб тым, каб стварыць унутраны правілы, якія могуць дазволіць такую працэдуру. Я лічу, што гэта парушэнне статута і выступала адкрыта супраць, як і некаторыя іншыя прадстаўнікі.

Мамаева кажа, што гатовая да незалежнага разбіральніцтва.

— Разглядаю ўсю гэтую сітуацыю як шкоду для маёй асабістай і палітычнай рэпутацыі, і буду абараняць сябе публічна ўсімі законнымі спосабамі.

Еўрарадыё накіравала запыт па каментар ў фракцыю Еўрапейскі выбар.