БАТЭ застаўся адзін крок да групавога этапа Лігі чэмпіёнаў

Нагадаем, у першым матчы, які прайшоў у Мінску, барысаўчане выйгралі з лікам 2:0. Пераможца супрацьстаяння выступіць у групавым раўндзе галоўнага кантынентальнага турніру.

Як паведамляе прэс-служба барысаўчан, пералёт з Беларусі да нацыянальнага аэрапорта "Бен-Гурыён" заняў больш за тры гадзіны. Гатэль "David Intercontinental", у якім пасяліліся беларусы, месціцца на беразе Міжземнага мора. Тэмпература паветра — каля 30 градусаў цяпла.

Ужо ў Ізраілі да БАТЭ дайшла вестка, што ў нападаючага Дзмітрыя Мазалеўскага ў Беларусі нарадзілася дачка!

Віктар Ганчарэнка і Рэнан Брэсан у панядзелак правялі прэс-канферэнцыю. Мясцовыя журналісты запыталіся ў Ганчарэнкі, што ён думае пра "Хапаэль", ці будзе рабіць змены ў склад сваёй каманды. Беларусаў азадачыла такое пытанне: "Цяпер шмат гавораць пра магчымасці вайны паміж Ізраілем і Іранам. Ці чулі вы пра гэта?". "Наша галоўная задача — засяродзіцца на заўтрашняй гульні", — сказаў Віктар Ганчарэнка.

Гл. таксама: БАТЭ правёў трэніроўку на "Рамат-Гане" (фота, відэа)

Сапернік БАТЭ ізраільскі "Хапаэль" з горада Кір'ят-Шмона сёлета ўпершыню гуляе ў кваліфікацыі Лігі чэмпіёнаў. "Хапаэль" перамог славацкую "Жыліну" — 2:0, 0:1 і бакінскі "Нефтчы" — 4:0, 2:2.

Адзначым, што поўная назва ізраільскага клуба — "Хапаэль Іроні Кір'ят-Шмона" ("рабочы гарадскі [клуб] Кір'ят-Шмона). Ён заснаваны ў 2000 годзе шляхам зліцця гарадскіх камандаў — "Хапаэль" і "Макабі". Каманда выступае ў Нацыянальнай лізе чэмпіянату Ізраіля. Найлепшае дасягненне — першае месца ў першынстве 2011/2012 гадоў.

Фота — fcbate.by, bymedia.net