Мытны камітэт: Ужо мора людзей "развярнулі" з мяжы

Нагадаем, з 11 чэрвеня перасекчы мяжу з поўным бакам бензіну можна толькі раз на пяць сутак. У адваротным выпадку давядзецца запаўняць дэкларацыю і плаціць мыту.

Еўрарадыё пацікавілася, ці прымусяць плаціць дадаткова, калі ў вашым баку — мінімум бензіну і зразумела, што яго хопіць усяго на адну паездку? На жаль, адзінага меркавання на гэты конт у памежнікаў няма.

У Дзяржаўным мытным камітэце папярэджваюць, што калі ў баку паліва ўсяго на адну паездку, усё адно мусіце заплаціць мыту. Інакш могуць узнікнуць праблемы:

“Пытанне даволі складанае, таму на сённяшні дзень лепш перастрахавацца. Праблемы могуць узнікнуць, адразу вам кажу”.

Паводле супрацоўніка Мытнага камітэта, плаціць мыту трэба не на мяжы, а ва ўнутраным пункце мытнага афармлення.

Супрацоўнік Мытнага камітэта: “Ва ўнутраным пункце мытнага афармлення (толькі не на мяжы!), вы павінны падысці і сказаць: “Я хачу выехаць з 20 літрамі бензіну, мне трэба, бо я буду перасякаць мяжу часцей, чым раз у 5 дзён. І калі трэба — заплаціць нейкія плацяжы. І з гэтымі дакументамі выязджаць ужо. А інакш я думаю, што ў кожным разе ў вас узнікнуць праблемы”.

Еўрарадыё: Ці былі ўжо выпадкі, калі людзей “разварочвалі” з мяжы?

Мытны камітэт: "Ууууу, мора!"

А вось на памежным пункце ў Ашмянах кажуць, што за палову бака грошы не бяруць. Вызначаюць аб’ём паліва там па датчыку, а калі ён няспраўны, то лічаць, што бак запоўнены цалкам.

“Канешне, можна не плаціць. Дзяржаўны мытны камітэт дае дазвол вывозіць паліва да бліжэйшай запраўкі, каб хапіла. Але “да бліжэйшай запраўкі” — панятак расцягнуты… Таму мы так вызначыліся, што працуем толькі па поўных баках. Калі палова бака, то бачна, што гэта людзі не дзеля камерцыйных мэтаў вязуць…”.

Еўрарадыё: А як вы вызначыце, якога аб’ёму ў мяне бак?

Ашмянская мытня: "Не перажывайце, у нас па ўсіх мадэлях ёсць такая інфармацыя".

Ёсць і такія мытні, супрацоўнікі якіх дагэтуль “знаходзяцца ў трансе” і не ведаюць, што рабіць! У гэтым Еўрарадыё прызнаўся дзяжурны Брэсцкай мытні:

“Нам прыйшла пастанова Саўміна 753, 755. 11 чэрвеня 2011 года. Гэта не мы прыдумалі. Усё гэта трэба глядзець там. Ну, вось у нас ёсць гэтыя дзве лістоўкі, і мы ў іх глядзім. А ніхто нам не тлумачыў таксама — як гэта замяраецца? Мы таксама ў трансе!

Прабачце калі ласка, у нас гэты тэлефон цяпер абрываецца. Мы ўтраіх не паспяваем на чатыры тэлефоны адказваць. Усе тэлефануюць і пытаюцца. Вось і цяпер хтосьці тэлефануе. Вы паглядзіце ў інтэрнэце гэтую пастанову”.

Дзяжурны Гомельскай мытні кажа, што ўсіх тых, хто не заплаціць мыту, будуць "разварочваць" з мяжы.

“Проста будзе забарона і ўсё. Адмовяць у мытным афармленні”.

Еўрарадыё: І ці шмат людзей ужо "развярнулі"?

Дзяжурны: "Вы ж навіны чытаеце, што было на Брузгах, што яшчэ дзе. Рэгулярна, скажам так…"