Пасля затрыманняў і сутак некалькі чалавек не выйшлі з-пад арышту ў Смаргоні
Юрась Кутузаў / hpravy.org
Пасля хапуна ў Смаргоні некалькі чалавек застаюцца пад арыштам. Не выйшаў з-за кратаў пасля заканчэння прысуджанага яму адміністрацыйнага тэрміну колішні грамадскі актывіст Юрась Кутузаў. Паводле звестак "Гарадзенскай Праваабароны", цяпер ён знаходзіцца ў следчым ізалятары ў Гродне.
Мяркуючы па ўсім, супраць яго ўжо распачатая крымінальная справа ці вырашаецца пытанне пра яе. Па якім дакладна артыкуле — пакуль невядома.
Не выйшла з-пад арышту і яшчэ адна з затрыманых — Марыэт Валюк. Паводле некаторых звестак, яна знаходзіцца ў следчым ізалятары ў Мінску. Верагодна, не выйшла на волю і яшчэ адна маладая дзяўчына, імя якой пакуль невядомае.
Агулам пад зачыстку ў Смаргоні трапілі каля 12 чалавек. Большасць з іх былі пакараныя суткамі і да гэтага часу выйшлі на волю.
