Палітвязень Дашкевіч атрымаў адзінае на год спатканне з жонкай

Спатканне доўжылася дзве гадзіны. Гэта адзінае спатканне, дазволенае палітвязню на год паводле турэмнага рэжыму. Пра гэта Наста Дашкевіч распавяла ў каментары Еўрарадыё:

Наста Дашкевіч: "Гэта адзіныя дзве гадзіны за год, то бок, адзінае спатканне за год. Выглядае Зміцер так, як чалавек, які два гады адбыў у зняволенні. Ён схуднелы, бледны вельмі, з нейкімі мяшкамі пад вачыма. Бачна, што шмат піша, шмат чытае... Але пры гэтым мае добры настрой, добры дух. Безумоўна, бачна, што фізічна ён стомлены ад сітуацыі, у якой знаходзіцца. Але надзеі не губляе, трымаецца".

Пра ўмовы ўтрымання Дашкевіча ў турме жонка кажа няшмат. Адзначае толькі, што ён знаходзіцца ў камеры адзін.

Па словах Насты, наступны раз яна спадзяецца пабачыць Змітра ўжо на волі — яго тэрмін арышту заканчваецца сёлета ў канцы жніўня.