Шайгу пацвердзіў інфармацыю брытанскай разведкі: вучэнні "Захад" адмяняюцца

Вайсковыя вучэнні "Захад-2023" адмяняюцца. Пра гэта 4 верасня заявіў міністр абароны РФ Сяргей Шайгу. Беларусь і Расія праводзілі гэтыя вучэнні раз на два гады. У 2021-м яны сталі найбуйнейшымі на постсавецкай прасторы за апошнія трыццаць гадоў.

Тыдзень таму брытанская разведка паведаміла пра тое, што Расія, верагодна, адмовілася ад правядзення стратэгічных вучэнняў "Захад-2023". Выказвалася меркаванне, што ў расіян проста не хапае войскаў і тэхнікі. Цяпер Шайгу пацвердзіў разведданыя брытанцаў. Ён няўдала паспрабаваў пажартаваць: "У гэтым годзе ў нас вучэнні на Украіне".

Дарэчы, гаворачы пра знішчаную ўкраінскую бронетэхніку за суткі ў раёне Рабоціна і Бахмута, Сяргей Шайгу прадэманстраваў свае веды ў матэматыцы: 6+6 = ...11. Не дзіўна, што штодзённым зводкам Мінабароны РФ не вераць нават расійскія вайскоўцы.