Шэрынг электрасамакатаў у Мінску “сышоў у адпачынак”, але хутка вернецца

Мінскі сервіс кікшэрынгу (так называюць шэрынг электрасамакатаў) не прапрацаваў і тыдня, але ўжо “сышоў у адпачынак”. 30 красавіка самакаты ад кампаніі Eleven сталі дасяжныя, а ўжо 5 траўня сервіс перапыніў працу.

Што праўда, Eleven абяцае хутка вярнуцца. 14 траўня карыстальнікі сервіса атрымалі паведамленне аб узнаўленні працы:

“Не сумуйце, мы хутка вернемся! Самакаты Eleven вернуцца ў горад зусім хутка і з прыемнымі навінамі: ездзіць стане больш камфортна — мы выправілі праблемы з сігналізацыяй, сканчэннем паездкі і абнавілі праграму; самакатаў стане больш — 200 асобнікаў; новы рэжым працы — катацца можна будзе 24/7”.

Шэрынг электрасамакатаў у Мінску “сышоў у адпачынак”, але хутка вернецца

У кампаніі Eleven Еўрарадыё пацвердзілі, што сервіс узяў перапынак з 5 траўня, каб вырашыць тэхнічныя недахопы, з якімі сутыкнуліся карыстальнікі. Праз некалькі дзён кікшэрынг адновіць сваю працу, але канкрэтных дат у кампаніі не называюць.

Шмат нараканняў сярод карыстальнікаў сацсетак было на кошты паслуг кампаніі Eleven. Кошт фарміруецца з дзвюх частак: 2 рублі — фіксіраваны пачатковы плацёж, які не залежыць ад працягласці карыстання самакатам. А за кожную хвіліну паездкі трэба плаціць па 30 капеек. Атрымліваецца, што 10-хвілінная паездка на электрасамакаце абыйдзецца ў 5 рублеў, а гадзінная паездка — ў 20 рублёў.

Як паведамілі Еўрарадыё ў кампаніі Eleven, пасля вяртання з “адпачынку” кошты на паслугі кікшэрынгу мяняцца не будуць.