Шуневіч паабяцаў, што мінскае "Дынама" дасць годны бой у будучых матчах КХЛ
Старшыня назіральнага савета ХК "Дынама-Мінск", міністр унутраных спраў Ігар Шуневіч паабяцаў, што дынамаўцы дадуць годны бой у будучых матчах КХЛ. У аўторак падчас сустрэчы з ім гульню хакеістаў у прайграным дома матчы рыжскаму "Дынама" раскрытыкаваў Аляксандр Лукашэнка. "Сорамна было глядзець", — сказаў ён. Паводле яго слоў, каманда абавязаная выйсці ў плэй-оф КХЛ і там годна выступіць.
Па выніках сустрэчы з Лукашэнкам Шуневіч заявіў, што ўпэўнены: каманда зробіць усё, што ад яе залежыць. "І гульцы, і трэнерскі штаб каманды "Дынама-Мінск" зробіць усё для таго, каб выйсці ў плэй-оф і не проста выйсці, але яшчэ і даць годны бой у гэтым вышэйшым дывізіёне чэмпіянату", — кажа старшыня назіральнага савета.
Па словах Ігара Шуневіча, у каманды для паспяховай гульні ёсць усе шанцы. Ён лічыць, што на гульню з рыжанамі паўплываў працяглы пералёт мінчукоў пасля гульні ў Кітаі. "Мы зробім усё магчымае і ўсё, што залежыць ад нас, каб апраўдаць надзеі нашых заўзятараў", — цытуе словы Шуневіча БЕЛТА.
Ужо сёння дынамаўцы прымаюць на "Мінск-Арэне" "Аўтамабіліст" з Екацярынбурга, пачатак у 19.30. Жывая трансляцыя запланаваная на тэлеканале "Беларусь 5".
