Спецслужбы Расіі маглі гадамі атрымліваць відэа з камер назірання ва Украіне
Можна было распазнаваць твары, аўтамабільныя знакі, фіксаваць рух асоб і транспарту / radiosvoboda.org
Спецслужбы Расіі маглі гадамі атрымліваць відэа з камер назірання ва Украіне, якія працуюць на расійскім праграмным забеспячэнні TRASSIR і адпраўляюць даныя на сервер у Маскве, паведамляе radiosvoboda.org. Высветлілася, што, нягледзячы на падзеі 2014 года, на ўкраінскай тэрыторыі ўстанаўліваліся і функцыянавалі тысячы такіх камер відэаназірання. Іх устанаўлівалі звычайныя грамадзяне, прыватны бізнес і дзяржаўныя прадпрыемствы, у тым ліку і для аб'ектаў крытычнай інфраструктуры (напрыклад, для Чарнобыльскай АЭС).
Эксперымент украінскіх журналістаў пацвердзіў, што відэа з камер, перад тым як трапіць на камп'ютэр ці тэлефон спажыўца, адпраўляецца на серверы, якія знаходзяцца ў Маскве і належаць кампаніям, звязаным з ФСБ РФ. У выніку апошняя мела магчымасці распазнаваць твары, аўтамабільныя знакі, фіксаваць рух асоб і транспарту.
Ад расійскага софту ва Украіне пачалі адмаўляцца пераважна ў 2022 годзе, з пачаткам маштабнай расійскай агрэсіі.
