Старэйшы сын старшыні Віцебскага гарвыканкама асуджаны на 10 сутак

10/12/2020 - 14:03

Суд у Старых Дарогах асудзіў Вадзіміра Заранкіна на 10 сутак арышту за ўдзел у несанкцыянаванай акцыі. У гэты тэрмін залічаць двое сутак, якія Заранкін правёў у Жодзінскім ізалятары пасля затрымання.

32-гадовы Вадзімір Заранкін — старэйшы сын старшыні Віцебскага гарвыканкама. 12 кастрычніка яго затрымалі каля гандлёвага цэнтра "Рыга" ў Мінску.

Яго малодшы брат Філіп у верасні быў пакараны арыштам з ўдзел у маршы супраць таемнай інаўгурацыі Аляксандра Лукашэнкі. Абодва браты падтрымліваюць пратэсты.

Вадзіміра затрымалі каля ГЦ "Рыга", куды ён прыехаў па пакупкі. У яго аўтамабілі разілі шкло, а самога Заранкіна выцягнулі з машыны. Яго даставілі ў ізалятар Жодзіна, дзе праз двое сутак прайшоў суд пад старшынствам суддзі са Старых Дарог. На пасяджэнне не выклікалі адваката Заранкіна, хаця хлопец падаваў адпаведнае хадайніцтва, таму суддзя перанесла разгляд справы. Вадзімір быў адпушчаны пад падпіску аб яўцы.

"12 снежня сканчаўся тэрмін адміністрацыйнага працэсу, судзілі пад самы канец тэрміну. Логіка казала, што могуць штраф даць. У прынцыпе, такі зыход [прысуджэнне сутак] таксама лічыў дапушчальным, але менш магчымым. Куды адправяць — не ведаю. Арыштаваць могуць у любы момант. Але ў Старых Дарогах [там праходзіў суд] учора не сталі", — распавёў Вадзімір у каментары Еўрарадыё.

На наступнае пасяджэнне па справе Заранкіна напрыканцы кастрычніка суддзя запрасіла звесткі пра сведку — міліцыянта з Савецкага раёна Мінска, які фігураваў пад выдуманым імем. Калі ж з РУУС прыйшоў адказ, што такі супрацоўнік у іх не працуе, суддзя вярнула дакументы на дапрацоўку з запісам: "Паколькі ўжыванне мер бяспекі да сведкі не прадугледжана ПВКаАП Рэспублікі Беларусь, названыя абставіны перашкаджаюць разгляду справы ў судовым пасяджэнні".

7 снежня справу Вадзіміра Заранкіна разглядала старшыня суда. Хлопец прыехаў на разгляд з адвакатам і двума сведкамі.

Сведка з боку міліцыі выступаў праз Skype і па-ранейшаму даваў сведчанні пад выдуманым прозвішчам — Громаў. Каб праверыць яго даныя, суддзя папрасіла Заранкіна і яго адваката выйсці з кабінета. Заўвагу адваката, што змена даных сведкі па адміністрацыйнай справе не прадугледжаная беларускімі законамі, суд праігнараваў.

"Міліцыянт запэўніваў, што асабіста бачыў мяне ў 20:30 з адлегласці не больш за 15 метраў. Маўляў, я быў на шэсці з іншымі людзьмі, "пазначанымі характэрнай сімволікай". Ён паглядзеў на мой твар і сказаў, што добра мяне памятае. Толькі вось забыўся, дзе знаходзіўся ў гэты час сам, хаця б прыкладна", — распавядае Вадзімір Заранкін у каментары TUT.by.

У абарону хлопца выступілі два сведкі. Таксама былі прагледжаныя 12 відэа з камер вонкавага назірання ГЦ "Рыга" і размешчаных у доме Заранкіна. На іх было бачна, што ў 22:00 ён выходзіў з уласнага дома, а праз паўгадзіны быў каля ўваходу ў ГЦ "Рыга". Пры гэтым вакол не было ні шэсця, ні людзей, "пазначаных характэрнай сімволікай".

Суддзя перанесла пасяджэнне на 9 снежня. У гэты дзень на працэсе зачыталі звесткі пра тое, што Вадзімір Заранкін некалькі разоў перавышаў хуткасць. А потым суддзя абвясціла пакаранне — 10 сутак арышту.

Заранкін плануе абскардзіць прысуд: на гэта ў яго ёсць пяць дзён.