Суд кіраўніка ўпраўлення аховы здароўя Гродзенскага аблвыканкама будзе ў Мінску
Начальніка ўпраўлення аховы здароўя Гродзенскага аблвыканкама Андрэя Стрыжака будуць судзіць 10 студзеня. Гучны працэс пройдзе ў судзе Цэнтральнага раёна Мінска, ён пачнецца ў чацвер у 10:15. Пра гэта на сваёй старонцы ў Facebook паведаміла прэс-сакратар Вярхоўнага суда Беларусі Юлія Ляскова.
Стрыжака абвінавачваюць у атрыманні хабару паўторна, у буйным памеры (ч. 2 арт. 430 КК). Ён па-ранейшаму знаходзіцца пад вартай.
Андрэй Стрыжак быў затрыманы ў чэрвені мінулага года. КДБ тады заявіў пра раскрыццё буйной карупцыйнай схемы ў сферы аховы здароўя, у якую ўваходзілі дзясяткі чалавек. Было паведамлена, што Стрыжак затрыманы за арганізацыю правядзення тэхнічнага абслугоўвання і рамонту медабсталявання ва ўстановах аховы здароўя ў Гродне.
11 студзеня Мінскі гарадскі суд пачне разглядаць гучную "справу медыкаў", па якой праходзяць экс-намеснік міністра аховы здароўя Ігар Ласіцкі і экс-галоўны ўрач 12-й гарадской клінічнай стаматалагічнай паліклінікі Мінска Уладзімір Краўчонак.
