Таталізатар падштурхоўвае беларускіх футбалістаў "зліваць" гульні?

Вядомы савецкі футбаліст Аляксандр Бубнаў у адным з нядаўніх інтэрв'ю распавёў пра тое, што ў 1980 годзе мінскае "Дынама" "зліла" матч маскоўскім аднаклубнікам. Дынамаўцы сустрэліся ў 27-м туры чэмпіянату СССР у Мінску, 9 кастрычніка 1980 года. Матч скончыўся з мінімальнай перавагай масквічоў: 0:1. Па словах Бубнава, толькі два беларускія футбалісты — Пудышаў і Курненін — гулялі ў поўную сілу.

"Я пра гэтую гісторыю чуў, — кажа вядомы футбольны трэнер Юрый Пунтус. — Калі маскоўскае "Дынама" было на мяжы вылету, праз вышэйшае кіраўніцтва МУС усё рабілася для таго, каб каманда засталася ў вышэйшай лізе. Зразумела, што мінскае "Дынама" тады было падначаленае Маскве".

У тым чэмпіянаце маскоўскае "Дынама" фінішавала ў двух ачках ад зоны вылету ў першую лігу. Менавіта столькі масквічы атрымалі за перамогу ў Мінску. Аднак Юрый Пудышаў, які гуляў той матч за мінчан кажа, што насамрэч мінская каманда сустрэчу не "здавала":

Юрый Пудышаў: "Мы проста хацелі з Курнілкам [Юрый Курненін. — ЕРБ] даказаць, што мы добрыя футбалісты, вартыя, і дарма нас тады "паперлі" з маскоўскага "Дынама". Хацелася даказаць, што яны былі не правыя, калі нас выгналі. Але вельмі добра адстаяў іх варатар, Мікалай Гантар. І таму мы ўсё ж прайгралі.

Ведаеце, як было крыўдна: я толькі 4 гульні паспеў згуляць у "Дынама" (Масква). А пасля ў "метраполь" схадзіў, сваіх сяброў пачаставаць "шампусікам". І мне адразу сказалі: Юра, малады ты яшчэ па рэстаранах хадзіць, пасядзі цяпер на лаве запасных. І давялося тады перайсці ў мінскае "Дынама". А мы тады вельмі хацелі гуляць..."

У 1980-м за мінскае "Дынама" гуляў і Людас Румбуціс.

"Я добра памятаю гэты матч. Я выйшаў на замену, і мяне проста зламалі. Я з Махавіком сутыкнуўся, і... Карацей, са стадыёна на "хуткай" мяне павезлі ў лякарню. Я тады зламаў плячо! На тры месяцы выбыў з гульні. І што, вы думаеце, што, калі здаеш матч, трэба так ламацца?"

Сёння сп. Румбуціс — прэзідэнт мінскай каманды "Партызан". Па яго словах, у сучасным беларускім футболе "дамоўныя" матчы не маюць сэнсу:

"Калі буйныя грошы круцяцца, мае сэнс дамаўляцца. У нас у футболе не такія... Да таго ж, калі быў Савецкі Саюз — буйная краіна — можна было факт дамовы схаваць. А Беларусь — краіна маленькая, тут усё адразу бачна!

Вось у нас у мінулым годзе быў матч БАТЭ — "Гомель". БАТЭ — датэрміновыя чэмпіёны краіны. "Гомель" — каманда ў зоне вылету з вышэйшай лігі. Вось тут, здавалася б, і дамовіцца! Але БАТЭ ні на каго не глядзіць і выйграе 3:0! А вы кажаце — "дамоўныя" гульні..."

Пра тое, што "дамоўныя" матчы ў беларускім футболе існуюць толькі на ўзроўні чутак, сцвярджае і Юрый Пудышаў, які і цяпер, у свае 56 гадоў, часам выходзіць на поле ў складзе брэсцкага "Дынама":

"Футбол беларускі — вельмі чысты. Бруду такога няма".

На думку галоўнага рэдактара газеты "Прессбол" Уладзіміра Беражкова, апошнім часам у беларускім футболе ахвочых арганізоўваць "дамоўныя" гульні сапраўды паменела:

"Наш футбол "ачысціўся" пасля справы Валерыя Шанталосава. Пасля таго, як пры ўдзеле газеты "Прессбол" былі выкрытыя спробы "пакупкі" матчаў нацыянальнай зборнай Беларусі супраць Чэхіі і Малдовы, і Шанталосаву было прад'яўленае абвінавачанне ў гэтым.

Але ён пазбег беларускага суду, бо тады ўжо быў грамадзянінам Расіі. Справу перадалі ў Новасібірск, дзе яна была закрытая за тэрмінам даўніны. Па нерэабілітуючых абставінах — гэта ўсё роўна, што прысуд. І на гэтай падставе Беларуская федэрацыя футбола прыняла рашэнне аб пажыццёвай дыскваліфікацыі Шанталосава. Пасля такой рэакцыі, натуральна, шмат хто пазбавіўся ахвоты ладзіць "дамоўныя" матчы. І, я б сказаў, што цяпер у гэтым плане беларускі футбол на парадак чысцейшы, чым раней".

Па словах сп. Беражкова, дрэнна тое, што беларускія футбалісты граюць на таталізатары і часам праз падстаўных асобаў робяць стаўкі супраць сваіх каманд. Натуральна, гэта раўназначна "зліву" гульні. Аднак даказаць такія выпадкі вельмі складана, калі не сказаць — немагчыма.