Трохгадовы хлопчык у Кобрыне вываліўся з пятага паверха

31 траўня каля 14-й гадзіны ў Кобрынскую лякарню прывезлі трохгадовага хлопчыка з разнастайнымі траўмамі. У справе разбіраецца Следчы камітэт.

Следча-аператыўная група выявіла, што здарэнне адбылося ў кватэры на пятым паверсе дома. Дзіця было ў кватэры разам са сваімі братам, сястрой, маці і цёткай. Маці была ў пакоі з дзецьмі, але не кантралявала іх, а цётка была ў кухні.

Без догляду дарослых хлопчык забраўся на стол каля акна, адтуль перабраўся на прываконне. Зачапіўшыся за гаршчок з раслінай дзіця вывалілася ў адкрытае акно. 

У выніку здарэння хлопчык атрымаў цялесныя пашкоджанні і быў шпіталізаваны. Кобрынскі райаддзел Следчага камітэта вядзе праверку.