У аварыі на снегаходзе загінуў амерыканскі гоншчык і шоўмэн Кен Блок
Кен Блок / Vida Press
У аварыі на снегаходзе ў штаце Юта загінуў амерыканскі гоншчык і шоўмэн Кен Блок. Яму было 55 гадоў. У Блока засталіся жонка і трое дзяцей, піша hooniganracing.com.
"Кен быў прадракальнікам, першапраходцам і іконай. А самае галоўнае, бацькам і мужам, — піша гоначная каманда Hoonigan Racing Division. — Нам будзе неверагодна яго не хапаць".
Блок — адзін з заснавальнікаў кампаніі DC Shoes, якая вырабляе спартыўны абутак для скейтбардыстаў. Сваю ралійную кар'еру ён пачаў у 2005 годзе. Таксама Кен Блок прымаў удзел у такіх відах спартыўных спаборніцтваў, як скейтбордынг, сноўбордынг, мотакрос і джымхана. Блок з'яўляецца гоншчыкам у серыі камп'ютэрных гульняў Colin McRae Rally, а таксама з'яўляўся ў аркадных аўтасімулятарах Need For Speed і Forza Horizon 4, нагадвае meduza.io.
