У Беларусі каля мяжы з Польшчай стартавалі вучэнні тэрабароны

У Беларусі каля мяжы з Польшчай стартавалі вучэнні тэрабароны. Яны працягнуцца з 25 сакавіка да 18 красавіка ў Гродзенскім раёне. У Мінабароны падкрэсліваюць, што згаданы "вучэбны збор" быў раней запланаваны.

Сярод іншага будуць адпрацоўвацца "пытанні фармавання, падрыхтоўкі і прымянення атрада народнага апалчэння" ("апалчэнцаў" набіраюць з лаяльных рэжыму Лукашэнкі людзей).

Паколькі задзейнічаюць "супрацьтанкавыя артылерыйскія падраздзяленні тэрытарыяльных войскаў", заняткі пройдуць і на палігонах. У сярэдзіне красавіка правядуць камандна-штабное вучэнне.

Тэрабарона — гэта асобны род войскаў ва Узброеных сілах Беларусі, які склікаецца толькі на час вайны або ў перыяд "напружанай ваенна-палітычнай абстаноўкі". Яна мае дапаможнае значэнне і складаецца з асоб, якія лічацца ў запасе. Удзельнікаў тэрабароны вучаць працы на КПП, ахове важных аб'ектаў, абароне ад дыверсантаў.